«Հայաստանում իմ առաջին տունը դարձել է «Եռաբլուրը»». Սիփան Պետրոսյան

Ֆուտբոլային մարզիչ Սիփան Պետրոսյանը 2020թ. կորոնավիրուսի համավարակով պայմանավորված չէր կարողացել Չինաստանից Հայաստան գալ և ներկա գտնվել հոր՝ «Արծիվ-մահապարտների միություն» ՀԿ նախագահ, գեներալ-մայոր Աստվածատուր Պետրոսյանի և հորաքրոջ որդու՝ գնդապետ Վահագն Ասատրյանի հուղարկավորությանը: Վահագն Ասատրյանը զոհվել էր 44-օրյա պատերազմի ժամանակ, իսկ Աստվածատուր Պետրոսյանը՝ պատերազմի ավարտից օրեր անց:

«Ցավոք, այդ ժամանակահատվածում շատ դժվար էր տեղաշարժվել․ թե՛ Վահագնի, թե՛ հորս հուղարկավորությանն օնլայն եմ մասնակցել: Վահագնի հետ 2020թ. հոկտեմբերի 10-11-ին հնարավորություն ունեցել եմ խոսելու, երբեք չեմ լսել տագնապ, միշտ դուխ է տվել, ասել՝ ուժեղ ենք: Հորս հետ ևս մշտապես կապի մեջ էի: Պատերազմի ընթացքում նա վարակվեց քովիդով․ հիվանդանոցում լավ էր զգում, ապաքինումը դրական էր, բայց Վահագնի մահվան և պարտության լուրից հետո կարծես ամեն ինչ գնաց դեպի անկում»,- «Ռեվյու» հաղորդման եթերում ասել է Սիփան Պետրոսյանը՝ հավելելով․ «Հայաստանում իմ առաջին տունը դարձել է «Եռաբլուրը»․ չեմ կարողանում հավատալ, որ հայրս և Վահագնը էլ չկան»։