«Իշխանություն կա՞, թե՞ չկա»․ Պետրոս Մակեյան

«Ժողովրդավարական հայրենիք» կուսակցության նախագահ Պետրոս Մակեյանը ֆեյսբուքյան իր էջում գրել է. «Բավականին երկար ժամանակ է՝ դադարել եմ լսել և արձագանքել աղետաբերին, այսօր որոշեցի հանրության համար անդրադառնալ գյուղատնտեսության ոլորտին, որին օրվա իշխանություններն ի սկզբանե սկսեցին արագացված տեմպերով կազմաքանդել, մասնավորապես՝ վերացնելով գյուղատնտեսության նախարարությունը, համայնքները տանելով խոշորացման, նպաստելով փոքր գյուղերի դատարկմանը, ինչը կազմաքանդում է պետականության հենասյուներից ամենակարևորը։
Անցած տարի որոշակի նախաձեռնությամբ հանդես եկան՝ փոխհատուցելով աշնանացան ցորենի սերմնացուի արժեքը, որը նպաստեց աշնանացան մշակաբույսերի քանակի կտրուկ ավելացմանը, սակայն, ռուս-ուկրաինական պատերազմով պայմանավորված, հացահատիկի գների կտրուկ անկումը հանգեցրեց նրան, որ հացահատիկ մշակող գյուղացիները սկսեցին վնասով աշխատել, իսկ Շիրակի մարզի, հատկապես Արթիկի տարածաշրջանի շատ համայնքներում, գյուղացիները կանգնեցին դատարկ տաշտակի առաջ՝ մկների հասցրած աղետի պատճառով։
Այստեղ տեղին է ահազանգել՝ ո՞ւր ես պետություն, իշխանություն կա՞, թե՝ չկա, և ի՞նչ են մտածում այս ուղղությամբ, իրավիճակից դուրս գալու ի՞նչ ելքեր են ներկայացնելու»։