«Ժողովուրդը պարզ ընտրություն ունի, եթե ցանկանում է ապրել Արցախում». Հայկ Խանումյան

ԱՀ տարածքային ու ենթակառուցվածքների նախկին նախարար Հայկ Խանումյանի գրառումը. «Արցախում քաղաքական երկու հոսանք կա։ Առաջինը գործող նախագահից ու նախկին նախագահներից կազմված խումբն է, որը հաշտվել է Արցախի կորստի հետ և միայն մեկ նպատակ ունի՝ փրկել ապօրինի եղանակով կուտակած հարստությունը։ Նրանք ակտիվորեն զբաղված են Արցախում գտնվող կապիտալի մոնետիզացմամբ, ունեն իրենց փող լվացողը, կուսակցությունները, ակտիվիստները։ Նախագահների խումբը, որի մեջ են նաև Ռուբեն Վարդանյանը, խորհրդարանական չորս ուժերը, այս վիճակից դուրս գալու որևէ ելք չեն առաջարկում, բայց գերխնդիր ունեն՝ չզիջել իշխանությունը, քանզի իշխանության կորուստը բերելու է նրանց ունեզրկման։
Երկրորդ հոսանքը Սամվել Բաբայանն է և իր կողմնակիցները, որոնք հստակ պատկերացնում են Արցախն այս վիճակից հանելու ճանապարհները, պատրաստ են պատասխանատվություն վերցնել, անպայման գնալու են ապօրինի հարստության պետականացման (այդ միջոցները հարկավոր են Արցախի դիմադրողականությունը բարձրացնելու համար)։ Ժողովուրդը պարզ ընտրություն ունի՝ եթե ցանկանում է ապրել Արցախում, զարգանալ, ուժեղանալ՝ պետք է կանգնի Սամվել Բաբայանի կողքին։ Եթե ցանկանում է փրկել Արկադիի, Բակոյի, Արայիկի ու նրանց շրջապատի հարստությունը, կորցնել Արցախը, վերածվել թափառականի՝ ապա նույնպես ընտրություն ունի՝ կարող է կանգնել նախագահների կուսակցության կողքին»: