«Համարձակ ղեկավարները կշնորհավորեին»․ Սեյրան Օհանյան

ԱԺ «Պատիվ ունեմ» խմբակցության պատգամավոր Սեյրան Օհանյանն անդրադառնալով ՀՀ իշխանությունների կողմից Արցախի նորընտիր նախագահին չշնորհավորելու փաստին, ինչպես նաև վարչապետ Նիկոլ Փաշինյանի երեկվա հայտարարությանը, ըստ որի՝ «շնորհավորելու բան էլ չկա», լրագրողների հետ զրույցում ասել է․ «Մեր ժողովրդի մի մասն է Արցախը, այն ձևավորված Հանրապետություն է, ինքնորոշվել է ու, անկախ ամեն ինչից, մեր երկրի ղեկավարները պետք է շնորհավորեին Արցախի նախագահին։ Գտնում եմ, որ չշնորհավորելու արդյունքը ոչ թե իրավիճակն է, այլ վախերը, որոնք գոյություն ունեն։ Վախերը՝ իրենց միջազգային պայմանավորվածություններից, որոնք երևի ձեռք են բերել Ադրբեջանի հետ։ Ադրբեջանի տարածքային ամբողջականությունը ճանաչելով՝ նրանք նաև Արցախն են ճանաչում Ադրբեջանի կազմում»։ Օհանյանի խոսքով՝ համարձակ ղեկավարները կշնորհավորեին։