Ֆրանսիան, Գերմանիան և Մեծ Բրիտանիան չեն չեղարկի Իրանի դեմ պատժամիջոցները

ԵՄ արտաքին քաղաքականության պատասխանատու Ժոզեպ Բորելը հայտարարել է, որ Մեծ Բրիտանիայի, Գերմանիայի և Ֆրանսիայի արտգործնախարարները ԵՄ-ին ծանուցել են, որ մտադիր չեն հոկտեմբերի 18-ին չեղարկել Իրանի դեմ պատժամիջոցները։

Նրա խոսքով, ինքը նամակ է ստացել Ֆրանսիայի, Գերմանիայի և Մեծ Բրիտանիայի արտաքին գործերի ղեկավարներից՝ Գործողությունների համատեղ համապարփակ ծրագրի (ԳՀԾ) իրականացման վերաբերյալ։

Բորելն ընդգծել է, որ երեք պետությունների նախարարները կարծում են, որ Իրանը 2019 թվականից ի վեր չի կատարում իր պարտավորությունները, և խնդիրը չի լուծվել վեճերի լուծման մեխանիզմի միջոցով։

Մինչ այս Պետդեպարտամենտի խոսնակ Մեթյու Միլլերը հայտարարել էր, որ Միացյալ Նահանգները մտադիր է ուշադիր հետևել Իրանի կողմից բացված 6 միլիարդ դոլարի չսառեցված ակտիվների ծախսերին և կարող է կրկին սառեցնել դրանք։

Միլլերն ընդգծել է, որ Կատարի բանկային հաշիվներին փոխանցվելուց հետո իրանական ակտիվները կհայտնվեն ԱՄՆ ֆինանսների նախարարության «խիստ վերահսկողության ներքո»: