«Ոգևորվել ՄԱԿ ԱԽ նիստի բոցավառ ելույթներով` նշանակում է ապրել տեսարանով». Կարպիս Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է․ «Նիկոլ Փաշինյանը, Արարատ Միրզոյանը, Արմեն Գրիգորյանը այդպես էլ չհասկացան, որ միջազգային ատյաններում հարց բարձրացնելը մի բան է, իսկ հարց լուծելը՝ լրիվ այլ բան։ Դիրքորոշում ներկայացնելը քիչ է, հուզախառն ելույթ ունենալը բավարար չէ, քանի որ դրանից զատ անհրաժեշտ է փակ դռների ետևում սեփական մոտեցումները ընդունելի և ընկալելի դարձնել նաև գործընկերների համար։
Այս պարզունակ գիտակցման բացակայությամբ հինգ տարի շարունակ ՀՀ իշխանությունը զբաղված է միայն խրոխտ ելույթներ ունենալով, ինքնավստահ դեմքի արտահայտությամբ դիրքորոշում ներկայացնելով, որոնք փաստացի՝ որպես կանոն, մնացել են չլսված, չընկալված։ Փոխարենը ունենք տասնյակ անլուծելի հարցեր, արյուն, վիշտ, ողբերգություն և կորսված երկիր։
Իսկ տպավորվել, ոգևորվել ՄԱԿ ԱԽ նիստի բոցավառ ելույթներով, նշանակում է ապրել տեսարանով, հմայվել ականջներով՝ չնկատելով գործընթացի բուն էությունն ու անտեսելով արդյունքը, որը մեր օգտին չէ»։