«Հերոս ծնողն ու դաստիարակողը չի կարող լինել ո՛չ պատվեր կատարող, ո՛չ վախկոտ». Նաիրա Հովսեփյան

ԱԺ-ն քննարկում է Վճռաբեկ դատարանի քաղաքացիական պալատի դատավորի թափուր տեղի համար առաջադրված դատավորների թեկնածուի ընտրության հարցը: Քիչ առաջ ելույթ ունեցավ դատավորի թեկնածու Նաիրա Հովսեփյանը, ով զոհված զինծառայող Գևորգ Արշակյանի մայրն է. «Հայաստանի Հանրապետությունն ինձ համար սրբություն է, ես առաջնորդվում եմ Գևորգ Արշակյանի կողմից ստեղծված հայրենիքի սիրո բանաձևով. հայրենիքը սիրում են՝ այն ճանաչելով, երկիրը սիրում են՝ այն շենացնելով: Մենք բոլորս պիտի հասնենք, գնանք մեր երազանքի հետևից»,- ասաց նա: Թեկնածուն անդրադարձավ նաև ընդդիմադիր խմբակցության պատգամավոր Գեղամ Մանուկյանի երեկվա հարցադրմանը՝ ասելով, որ ինքը միշտ հպարտ է քայլել. «Դուք ուզում էիք ասել, որ ես պատվեր կատարող եմ, վախկոտ եմ: Պարո՛ն Մանուկյան, հերոս ծնողն ու դաստիարակողը չի կարող լինել ո՛չ պատվեր կատարող, ո՛չ վախկոտ»,- նշեց Հովսեփյանը: