««Պարտվել ես՝ բարի եղիր ընդունել իմ պայմանները» սկզբունքի հիման վրա խաղաղություն չի կարող ձևավորվել». Խոսրով Հարությունյան

«ԱՄՆ-ի կամ Ֆրանսիայի միջնորդի կարգավիճակը կորցնելը Ալիևը չի որոշում, նրա համաձայնությամբ չէ, որ այս կամ այն պետությունը կարող է գլոբալ խնդիրներում ստանձնել միջնորդի պատասխանատու դերակատարումը»,- «Երկիր մեդիա»-ի եթերում անդրադառնալով Ադրբեջանի՝ ԱՄՆ-ին ուղղված սպառնալիքներին, «Երկիր մեդիայի» եթերում ասել է ՀՀ նախկին վարչապետ Խոսրով Հարությունյանը: «Ես կարծում եմ, որ գլխավոր խնդիրը, այսպես կոչված, խաղաղության պայմանագիրն է։ Ինչո՞ւ՝ «այսպես կոչված», որովհետև այդ պայմանագիրը չի կարող կոչվել «խաղաղության պայմանագիր»։ Դա կարող է լինել, լավագույն դեպքում, Ադրբեջանի և Հայաստանի միջև միջպետական հարաբերությունների կարգավորման մասին պայմանագիր»: Հարությունյանի համոզմամբ, նման պայմանագիրը կդառնա դանդաղ գործողության ական՝ տարածաշրջանի կայունության ու խաղաղության համար․ «44-օրյա պատերազմի արդյունքների հիման վրա կառուցել անվտանգային նոր ճարտարապետություն տարածաշրջանում, դա հեռանկար չունեցող մոտեցում է: «Պարտվել ես՝ բարի եղիր ընդունել իմ պայմանները» սկզբունքի հիման վրա տարածաշրջանում կայուն, երկարաժամկետ խաղաղություն չի կարող ձևավորվել»,- ասել է ՀՀ նախկին վարչապետը։