Փասադենայի «Վարդերի շքերթում» հայերը կրկին մրցանակ են շահել

3106

Հինգշաբթի, 04 հունվարի, 2024 թ., 23:24

ԱՄՆ-ի Քալիֆորնիա նահանգի Փասադենա քաղաքում անցկացվել է Վարդերի 135-րդ շքերթը: Ավանդաբար հունվարի 1-ին տեղի ունեցող այս շքերթին տարիներ շարունակ մասնակցում են նաև հայ-ամերիկյան Վարդասայլի ընկերակցության (American Armenian Rose Float Association) թիմը:

Այս տարվա շքերթի համար ընտրվել էր «Երաժշտության աշխարհի տոնը» թեմատիկան, որին հայկական թիմը մասնակցել է «Հայկական մեղեդիներ» խորագրով: Շքերթի ժամանակ ամբողջովին ծաղիկներով հարդարված շարժական հարթակի վրա ներկայացվել է մոր և դստեր քանդակ՝ շրջապատված հայկական ավանդական խորհրդանիշներով՝ նուռ, ծիրան, դուդուկ, շվի, բլուլ, պարկապզուկ և այլն: Քանդակի շուրջ ներկայացված են նաև թռչուններ, որոնք տարածված են Հայկական լեռնաշխարհում՝ արագիլ, կռունկ ևայլն:

«Հայկական մեղեդիները» արժանացել է «Գրանդ Մարշալ» մրցանակին՝ շարժական հարթակի կրեատիվ հարդարանքի համար:

«Վարդերի շքերթը» (անգլ.՝ Rose Parade), Քալիֆորնիա նահանգում անցկացվող շքերթներից ամենամեծն է։ Անցկացվում է ամեն տարի՝ հունվարի 1-ի առավոտյան, Փասադենա քաղաքում։

«Վարդերի շքերթի» ժամանակ հազարավոր մարդիկ են գալիս Փասադենա, հեռարձակումները դիտում են միլիոնավոր մարդիկ ինչպես Միացյալ Նահանգներում, այնպես էլ ամբողջ աշխարհում։