«Ո՞վ է ձեզ իրավունք տվել քար նետել այս հերոսական պարաշրջանի ուղղությամբ». Գեղամ Օհանյան

Ակտիվիստ, «Խարույկ» ակումբի տնօրեն Գեղամ Օհանյանը ֆեյսբուքյան իր էջում գրել է. «Ով ազգային մաքուր մշակույթին դեմ է խոսում, նա խոսում է ազգի ինքնության դեմ։ Նա խոսում է ազգի դեմ․․․
Ով նեղվում է, որ պարտության մեջ մարդիկ պարում են, թող թեքվի իր շուրջը ու նայի, թե ինչպես են նշում ազգային մշակույթին անհաղորդ մարդիկ։
Ով նեղվում է, որ ուրախացողներ կան, թող գնա ու հերթով հարցնի այս պարաշրջանում կանգնած երիտասարդներին, աղջիկ թե տղա, ուր են եղել իրենք և ինչ են արել պատերազմի ժամանակ։
Տղաների մեծ մասը ճակատում է եղել, մնացածը աղջիկների հետ միասին անքուն գիշերներ են անցկացրել կամավորական ամենատարբեր գործերի մեջ։
Իսկ ո՞ւր եք եղել դուք՝ մեղադրողներդ, և ո՞վ է ձեզ իրավունք տվել քար նետել այս հերոսական պարաշրջանի ուղղությամբ։ Մի հատ լավ նայեք ձեզ հայելու մեջ, հա՞յ եք․․․
Մեր թմբուկը պիտի զարկի ի հեճուկս ձեզ, ի հեճուկս մեր բոլոր թշնամիների, որովհետև մենք կա՛նք, մենք պարտվել ենք, բայց կա՛նք։
Ի՛ մղձավանջ թշնամյաց․․․
Փա՛ռք հանուն հայրենիքի ընկածներին․․․
Փա՛ռք հայրենականը պահող ու զարգացնողներին․․․
Փա՛ռք լուսավոր ու բարեպաշտ շառավիղներին»: