Ադրբեջանի և ԱՄՆ-ի միջև լարվածությունը պահպանվում է. Լուիս Բոնոն Երևանից Բաքու չի մեկնել

Ադրբեջանի և ԱՄՆ-ի միջև լարվածությունը պահպանվում է. ԱՄՆ Կովկասյան բանակցությունների հարցերով ավագ խորհրդական, ԵԱՀԿ Մինսկի խմբի ամերիկացի համանախագահ Լուիս Բոնոն Երևանից Բաքու չի մեկնել, գրում են ադրբեջանական լրատվամիջոցները:

«Օրեր առաջ ԱՄՆ Պետդեպարտամենտն աշխարհում կրոնական ազատությունների մասին հատուկ զեկույցում Ադրբեջանը ներառել է «հսկողության տակ գտնվող երկրների» ցուցակում: Պաշտոնական Բաքուն այդ քայլը որակել է որպես «Ադրբեջանի նկատմամբ կողմնակալության հերթական դրսևորում»: Ամենայն հավանականությամբ, հենց այդ պատճառով Լուիս Բոնոն չի մեկնել Բաքու: Դատելով Հայաստանում ԱՄՆ դեսպանատան տարածած տեղեկությունից՝ Բոնոն Երևան այցի ժամանակ հանդիպել է բարձրաստիճան պաշտոնյաների հետ և քննարկել հայ-ամերիկյան համագործակցության ընդլայնման, ինչպես նաև տարածաշրջանային խաղաղության և կայունության ապահովմանն ուղղված ջանքերը: Ադրբեջանական կողմը որոշակի կասկածներ ունի վաշինգթոնյան ձևաչափի վերաբերյալ՝ կապված 2023 թվականի սեպտեմբերի իրադարձությունների վերաբերյալ ԱՄՆ դիրքորոշման հետ: Եվրոպայի և Եվրասիայի հարցերով պետքարտուղարի օգնական Ջեյմս Օ'Բրայենը ԱՄՆ Քոնգրեսի լսումների ժամանակ մի շարք հակաադրբեջանական հայտարարություններ է արել: Ավելի ուշ ամերիկյան կողմը, փորձելով մեղմել առաջացած լարվածությունը, Բաքու է ուղարկել նույն Օ'Բրայենին, որը բացատրել է Պետդեպարտամենտի դիրքորոշումը: Սակայն, ԱՄՆ-ի և Ադրբեջանի միջև լարվածությունը պահպանվում է»,- գրում են ադրբեջանական լրատվամիջոցները: