«Այգու մի կողմում քանդում են շինությունները, մյուս կողմում ապօրինի շինթույլտվություն տալիս». Մեսրոպ Մանուկյան

Երևանի քաղաքապետարանն Արամ Սարգսյանի «Հանրապետություն» կուսակցության անդամ, Վայքի քաղաքապետի թեկնածու Կառլեն Մինասյանին պատկանող «Էկո Բիլդինգ» ՍՊԸ-ին Լվովյան 2 հասցեում բարձրահարկ շենքեր կառուցելու շինթույլտվություն է տվել։ Երևանի ավագանու ընդդիմադիր «Մայր Հայաստան» խմբակցության անդամ Մեսրոպ Մանուկյանը պնդում է, որ շինթույլտվությունն ապօրինի է, և փաստեր է ներկայացնում։ Երևանի քաղաքապետարանը կանաչապատման անվան տակ մի ձեռքով քանդում է Թաթուլ Կրպեյանի անվան այգու տները, մյուս ձեռքով շինթույլտվություններ է տալիս, այս մասին գրում է «Հրապարակ»-ը: Այգում գտնվող տները, որտեղ քաղաքացիները շուրջ 10 տարի է՝ ապրում են (մարդիկ լույս, ջուր են քաշել), հիմա քաղաքապետարանը կանաչապատման անվան տակ քանդում է՝ հայտարարելով, որ դա նրանց սեփականությունը չէ։ Մանուկյանն ասում է, որ այս պատմության մեջ զավեշտալի բան կա՝ քաղաքապետարանն այգու մյուս կողմում շինթույլտվություն է տվել «Էկո Բիլդինգ» ՍՊԸ-ին, որը չի համապատասխանում նորմերին, քանի որ շինթույլտվությունը տալու հիմքեր ստեղծելու համար ֆոտոշոփով տեղափոխել են այդ տարածքի կողքին գտնվող բարձրահարկ շենքը։
Այս խնդրի ուղիղ շահառուն Լվովյան 2 հասցեի բնակիչներն են, որոնք դիմել են գլխավոր դատախազին։ Լվովյան 2 շենքի համատիրության նախագահ Գևորգը, խոսելով իրենց շենքի կողքին սկսվող այդ շինարարության մասին, նշել է. «Մենք բացահայտել ենք մի շարք խնդիրներ, որոնք առարկայորեն թղթերով ներկայացրել ենք։ Քարտեզի վրա համեմատելով կադաստրային ծածկագրով տվյալները, գլխավոր հատակագիծը և երկու էլիտար շենքերի շինթույլտվությունները, աբսուրդի իրավիճակ ենք ստանում։ Հաշվի չեն առել հարակից շենքերի սեյսմակայունության խնդիրը, ֆոտոշոփով արված «գյուտի» արդյունքում այդ էլիտար շենքերը կառուցվում են նաև Թաթուլ Կրպեյանի անվան այգու հաշվին։ Այս խնդրի մասին արդեն 2 ամիս է՝ խոսում ենք, սակայն՝ ապարդյուն»։ Մանրամասները՝ սկզբնաղբյուրում: