«Սա, մեղմ ասած, նախաքննություն չի, սա որևէ միաբանության համոզմունքների քարոզ է». փաստաբան

Էկոնոմիկայի նախկին նախարար Վահան Քերոբյանի պաշտպան Տիգրան Եգորյանն այսօրվա ասուլիսի ժամանակ մանրամասներ է ներկայացրել նախաքննական աշխատանքների վերաբերյալ․«Քննչական կոմիտեն օպերատիվ հետախուզական աշխատանքների արդյունքում պարզել է, որ էկոնոմիկայի նախարարության պաշտոնատար անձինք, նախնական համաձայնությամբ, դիտավորություն ունենալով, կոնկրետ մեկ կազմակերպությանն օժանդակելով ընդդեմ մյուսի, իրականացրել են հակամրցակցային քաղաքականություն և գործողություններ, խախտել են Գնումների մասին օրենքը, ՀՀ կառավարության որոշումները, արդյունքում մի կազմակերպություն դուրս են հանել մրցակցությունից, հայտնի է, որ խոսքը «Սիներջի» և «Հարմոնիա» կազմակերպությունների մասին է։ Մի շարք անձանց ձերբակալել են, մի քանիսին կալանավորել, իսկ հանգուցալուծումը նախկին նախարար Վահան Քերոբյանի ձերբակալությունն ու նրա նկատմամբ խափանման միջոց կիրառելն է եղել։ Մեր դիտարկմամբ, այդ հսկայածավալ օպերատվ հետախուզական աշխատանքների արդյունքները բավական մոտ են զրոյի։ Խիստ խափանման միջոցների կիրառման և դրանք ծառայեցնելով որպես ցանկալի ցուցմունքներ տալու հարկադրանքի միջոց, սկսել են ձևավորել մտածված նարատիվի հիմքեր։ Ստացվել են հարմարեցված ցուցմունքներ, ինչպես տեսնում ենք գլխավոր դատախազության հայտարարություններից, հենց այդ ցուցմունքները ստանալու բերումով նրանց նկատմամբ խափանման միջոցները փոխվել են, ինչը մարտավարությունը ակնհայտ է դարձնում։
Նախաքննության մարմինը հարցեր չունի պարոն Քերոբյանին, չկան բովանդակային հարցեր, որոնցից հասկանալի կլինի, որ մարդիկ ցանկանում են քննել, պարզել բազմակողանիորեն, թե ի՞նչ է տեղի ունեցել։ Սա, մեղմ ասած, նախաքննություն չի, սա կարծես որևէ միաբանության կողմից իրենց համոզմունքների քարոզ է»,- ասաց փաստաբանը: