«Եթե դու պատրաստ ես Ադրբեջանին տալ հայկական գյուղերը, ապա նաև պարտավոր ես խնդիր դնել Ադրբեջանի վրա` վերականգնել ԼՂ-ի ինքնավար կարգավիճակը». Վարդան Օսկանյան

ՀՀ արտաքին գործերի նախկին նախարար Վարդան Օսկանյանը ֆեյսբուքյան իր էջի տեսաուղերձում անդրադառնում է հայկական տարածքների՝ հերթական անգամ հակառակորդին զիջելու՝ Փաշինյանի պատրաստակամության մասին:

«Եթե այդ որոշմանը Փաշինյանը հանգել է, նշանակում է՝ ինքն ակամայից կիրառության մեջ է դնում միջազգային իրավունքի մի շատ կարևոր սկզբունք՝ Uti possidetis, որը գալիս է հին հռոմեական ժամանակներից և հաճախ կիրառվում է մինչ օրս: Դա կիրառվում է, երբ կտրուկ իրավիճակ է փոխվում ինչ-որ մի տարածաշրջանում և նոր սահմաններ պետք է ձևավորվեն այս սկզբունքով՝ ինչ իմն է, իմն է, անկախ նրանից, թե ինչ պայմաններում է այն ձեռք բերվել:
Հիմա եթե դու պատրաստ ես Ադրբեջանին տալ հայկական գյուղերը, ապա դու նաև պարտավորես խնդիր դնել Ադրբեջանի վրա՝ վերականգնել ԼՂ-ի ինքնավար կարգավիճակը: Սրանք երկուսն էլ նույն կարգավիճակի վրա են: Դու չես կարող Uti possidetis կիրառել միակողմանիորեն: Հայաստանն իրավունք ունի այդ հարցը բերել օրակարգ»,- նշում է դիվանագետը: