Չենք զարմանա, եթե Նիկոլն Ալիևի պահանջով մեր հայրենիքի տարածքում անցակետեր տեղադրի․ ԱԺԲ

Ազգային-ժողովրդավարական Բևեռի խորհուրդը հայտարարություն է տարածել․ «Այսօր վաղ առավոտից Նիկոլի անձնական և հակապետական ցանկությունները սպասարկող իրավապահները բերման են ենթարկում «Մարտական եղբայրության» անդամներին՝ (հետևորդներին) դրանով իսկ փորձելով կանխել նրանց այցը Վերին Ոսկեպար։
Այս ամենը ոչ միայն հակաօրինական է, այլ Նիկոլի դրդմամբ ուժայինների կողմից թշնամու ցանկությունների ու հրահանգների կատարման դրսևորում է։
Ազգային-ժողովրդավարական Բևեռի խորհուրդը բազմիցս անդրադարձել և դատապարտել է այսօրինակ այլ երևույթներ ևս, երբ հակահայ վարչախումբը, սպասարկելով ռուս-թուրքական շահերը, գործի է դրել ռեպրեսիվ բազմաբնույթ մեթոդներ և ճնշել ցանկացած պետականանպաստ գործողություն կամ շարժում։
Վարչախումբը յուրաքանչյուր անգամ նոր, աննախադեպ ապօրինություն է գործում և այս անգամ փաստացի զրկել է անձանց տեղաշարժվել ՀՀ տարածքում, ինչով էլ վկայում է իր հավատարմությունը թշնամուն։
Չենք զարմանա, եթե Նիկոլն Ալիևի պահանջով մեր հայրենիքի տարածքում նոր անցակետեր տեղադրի, ինչպես կատարեց Սյունիքում։
Ազգային-ժողովրդավարական Բևեռի խորհուրդը խստորեն դատապարտում է «Մարտական եղբայրության» անդամների (հետևորդների) առևանգումները ոչ միայն դրանց ապօրինի և կամայական լինելու պատճառով, այլ նաև այն հիմքով, որ այդ գործողություններով վարչախումբը շարունակում է սպասարկել թշնամու շահերը և լեգիտիմացնել նրա հանցավոր հավակնությունները Հայաստանի Հանրապետության ինքնիշխանության և տարածքային ամբողջականության նկատամբ»։