«Թաքցնում եք, որ «Սորոսի» հիմնադրամում եք աշխատել, ի՞նչ երաշխիք, որ ազդեցության գործակալ չեք»․ Ագնեսա Խամոյան

Ազգային ժողովում քննարկվում է Սահմանադրական դատարանի դատավորի ընտրության հարցը, թեկնածուն Դավիթ Խաչատուրյանն է, ով ՀՀ հակակոռուպցիոն կոմիտեի նախագահ Սասուն Խաչատրյանի եղբայրն է։ «Այն, որ Հակակոռուպցիոն կոմիտեի նախագահի եղբայրը, որին ՔՊ-ն գործուղում է Սահմանադրական դատարան, չի կարող անկողմնակալ լինել, ակնհայտ է։ Բայց հարցս հետևյալն է, ինչո՞ւ եք ձեր կենսագրականից թաքցնում այն, որ 4 տարի եղել եք «Սորոսի» հիմնադրամի տնօրենների խորհրդի անդամ, ապա 4 տարի՝ տնօրենների խորհրդի նախագահ։ Զուգահեռաբար՝ 2006-2013թթ․ եղել եք նաև ԱՄՆ դեսպանատան գրանցված աշխատող։ Ես, որպես ԱԺ պատգամավոր, ի՞նչ երաշխիքներ պետք է ունենամ, որ դուք՝ նման հարուստ կենսագրությամբ, ազդեցության գործակալ չեք»,- հարց ուղղեց «Հայաստան» խմբակցության պատգամավոր Ագնեսա Խամոյանը։
Դավիթ Խաչատուրյանը պատասխանեց, որ «Սորոսի» հիմնադրամի աշխատող չի եղել, այնտեղ զբաղվել է հասարակական գործունեությամբ, որի դիմաց չի վարձատրվել, այլ ստացել է ծախսերի սիմվոլիկ փոխհատուցում։ Իսկ երաշխիք ներկայացնելու կարիք չունի, քանի որ, իր խոքսով, ոչ մի վտանգ չկա։