«Փաշինյանին զսպելու միակ տարբերակը տրված «քարտ բլանշ»-ը հետ վերցնելն է»․ Մամիջանյան

««Պատիվ ունեմ»-ը և ՀՀԿ-ն հրապարակայնորեն աջակցել, աջակցում և աջակցելու են «Սրբազան պայքար»-ին»,- 24TV-ի եթերում ասաց պատգամավոր Հայկ Մամիջանյանը՝ նշելով, որ իրենց դիտողություններն ու առաջարկները հրապարակային չեն հնչեցնում, հարկ եղած դեպքում շարժման առաջնորդների հետ անձամբ են այդ մասին խոսում։ «Վերջերս ինչ-որ թեզեր են տարածում, թե ցանկացած պրոցես, որում ներգրավված է խորհրդարանական ընդդիմությունը, ձախողված պրոցես է։ Դա մաքրամքուր փաշինյանական թեզ է»,- ասաց Մամիջանյանը։ Լրագրողի դիտարկմանը, թե մարդիկ ուզում են, որ ՀՀԿ-ն ամեն ինչով աջակցի, բայց հրապարակում չերևա, Մամիջանյանը պատասխանեց․ «Հայաստանում չկա մի «հրաշք», որ գա, ՀՀ ամենահզոր կուսակցություններից մեկին ասի՝ դուք չպետք է զբաղվեք քաղաքականությամբ։
ՀՀԿ-ն չի ձգտում գալ իշխանության, այլ ձգտում է իշխանափոխության, թե հետո ինչ կլինի՝ ժողովուրդը կորոշի։
Մենք իրական ընդդիմադիր բոլոր պրոցեսներին շատ լոյալ ենք եղել։ Անձամբ ես՝ իմ ընկերների հետ, մասնակցել եմ ցույցի, որտեղ հարթակից փնովել են նախկիններին, բայց մենք այդտեղից չենք գնացել, որովհետև եթե գնայինք, կմնար հարթակի մարդն ու իր տնեցիք»,- ասաց Մամիջանյանը։ Խոսելով Փաշինյանի հեռացման գործիքակազմի մասին՝ նշեց․ «Փաշինյանն ատամներով պայքարելու է իշխանությունը պահելու համար, նրան զսպելու միակ տարբերակն այն է, որ իրեն «քարտ բլանշ» տված ուժերը, արևմտյան կառույցները հետ վերցնեն այդ «քարտ բլանշը»»: