«Նորատուսում մեր աջակիցներից մեկի մեքենան ջարդուփշուր են արել». Գառնիկ Դանիելյան

ԱԺ «Հայաստան» խմբակցության պատգամավոր Գառնիկ Դանիելյանը «ԱրմԼուր»-ի եթերում հայտնել է, որ Սրբազան շարժման հավաքների և այցերի աշխարհագրությունն ընդլայնվել է, որի ընթացքում իշխանության կողմից բազմաթիվ խոչընդոտներ են լինում. «Մեր շարժումը վերափոխվել և դարձել է ո՛չ միայն Տավուշի համար մղվող պայքար: Ցավով պիտի արձանագրենք, որ այն խնդիրները, որոնց բախվել է տավուշցին, այսօր այդ խնդիրներին առերեսվում են նաև Գեղարքունիքի մեր հայրենակիցները, նույնը՝ Վայոց ձորի, Սյունիքի մեր քույր, եղբայրները: ՀՀ-ում գրեթե այդպիսի մարդ չկա, որ այդ վտանգն իրեն հասու չլինի: Հանդիպումների ընթացքում փորձում ենք ներկայացնել այս քաղաքականության արդյունքում ինչ կարող է լինել տվյալ մարզերում, համայնքներում, նաև մեր ծրագրերն ենք ներկայացնում: Այս ընթացքում բազմաթիվ խոչընդոտներ են լինում իշխանության կողմից. կիրակի, երբ այցելել ենք Նորատուս համայնք, մեր աջակիցներից մեկի մեքենան, որը եկեղեցուց քիչ հեռու էր կանգնած, ջարդուփշուր են արել: Դրանից առաջ գյուղացիներին զգուշացրել են, որ որևէ մեկը չմասնակցի, այլապես խնդիրներ կունենա... Երեկ ես ամրակապված եմ եղել, բայց պարեկային ծառայողության աշխատողը, լկտիաբար ստելով, ինձ վրա ակտ էր գրում: Կողքի մարդիկ տեսել, ապշել էին»,- նշել է շարժման համահիմնադիրը: