«Վարչական շրջանների աշխատակազմերը քաղաքական հիվանդ համակարգի մնացորդ են»․ Արեգ Սավգուլյան

Պատմաբան Արեգ Սավգուլյանի ֆեյսբուքյան գրառումը. «Վարչական շրջանների աշխատակազմերը քաղաքական հիվանդ համակարգի մնացորդ են և ենթակա են վերացման՝ վիրահատական միջամտությամբ։
1. Մի քանի օր է տեղեկատվական դատարկության ֆոնին խոսվում է Երևանի վարչական շրջանների (ՎՇ) ղեկավարների ազատման կամ նոր նշանակումների մասին։ Մասնավորապես Սաշա Կատվալյանի մասով այնպիսի աղմուկ էր ասես գեներալ-նահանգապետ է նշանակվում։ Իսկ երբևէ մտածել եք Երևան քաղաքի արդյունավետ կառավարման հիմնավորմամբ ձևավորված և համապետական կամ ՏԻՄ ընտրությունների ժամանակ քվե բերելու առաքելություն իրականացնելուց ի՞նչ գործառույթ են կատարում այս կույրաղիքային օղակները։
2. ՎՇ-ը ղեկավարի պաշտոնը նախկին թաղապետի իմիտացիան է, տխուր վերապրուկը։ Եթե նախկինում թաղապետի պաշտոնը ընտրովի էր և թաղի բնակիչները ունեին ընտրության հնարավորություն, հիմա դրանից զրկված են։ Բացի այդ, վարչական շրջանի ներկա ղեկավարները չունեն էական գործառույթներ և հիմնականում կատարում են թույլ վերահսկողի և փոստատարի գործառույթներ, ասել է թե «Սիմոն տար, Սիմոն բեր»՝ լինելով քաղաքապետի աչքը թաղում։ Իսկ մեզ պետք է 12 ակնանի քաղաքապետ մեր հարկերի հաշվին, իհարկե ո՛չ։
3. Համայնքների խոշորացման և կառավարման համակարգի ավտոմատացման պրոցեսում, մոտ ապագայում կլուծարվեն նաև Երևանի ՎՇ-ների ուռճացված աշխատակազմերը, իսկ նախկին թաղապետերին փոխարինած ՎՇ-ի ղեկավարները կվերածվեն օֆիս-մենեջերի և կգործեն մեկ պատուհան սկզբունքով՝ ըստ այդմ՝ մենք կունենանք ընդամենը 12 ենթապատուհան, որովհետև գլխավորը կլինի Երևանի քաղաքապետարանում»։