Հինգշաբթի, 18 սեպտեմբերի, 2025 թ.
|
Ստեփանակերտում`   +16 °C

«Նեթանյահուի կյանքը կավարտվի այնպես, ինչպես ավարտվեց Հիտլերի կյանքը»․ Թուրքիայի ԱԳՆ

«Նեթանյահուի կյանքը կավարտվի այնպես, ինչպես ավարտվեց Հիտլերի կյանքը»․ Թուրքիայի ԱԳՆ
706
Երկուշաբթի, 29 հուլիսի, 2024 թ., 11:06

Գազայի հատվածում տիրող իրավիճակի համար պատասխանատու Իսրայելի վարչապետ Բենյամին Նեթանյահուի կյանքը կավարտվի այնպես, ինչպես ավարտվեց Ադոլֆ Հիտլերի կյանքը: Այս մասին ասվում է Թուրքիայի ԱԳՆ-ի տարածած հաղորդագրության մեջ, փոխանցում է ТАСС-ը։

Հիշեցնենք, որ ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան «կարող է մտնել Իսրայել, ինչպես մտավ Ղարաբաղ և Լիբիա»։ Հայտարարությանն անդրադարձել էր Իսրայելի արտգործնախարար Իսրայել Կացը՝ նշելով, որ Էրդողանին սպասվում է Սադամ Հուսեյնի ճակատագիրը։

Մեկնաբանելով Էրդողանի խոսքերը՝ Թուրքիայի արտգործնախարար Հաքան Ֆիդանը X-ում գրառում է կատարել, որում, մասնավորապես, ասվում է․ «Թուրքիայի նախագահը դարձել է մարդկության խղճի ձայնը։ Ցեղասպան Նեթանյահուի վախճանը նույնն է լինելու, ինչ ցեղասպան Հիտլերի վախճանը։ Նրանք, ովքեր փորձում են ոչնչացնել պաղեստինցիներին, իրենց արարքների համար պատասխան կտան այնպես, ինչպես նացիստները։ Մարդկությունը կլինի պաղեստինցիների կողքին»։