«Պուտինի նպատակն է հավաստիանալ, որ «Զանգեզուրի միջանցքի» հարցը դուրս է գալու օրակարգից»․ Գրիգոր Բալասանյան

«Ադրբեջանը Շոյգուի այցից հետո հայտարարեց, որ «Զանգեզուրի միջանցքի» հարցը և, առհասարակ, ենթակառուցվածքների ապաշրջափակման հարցը դուրս է գալիս բանակցությունների օրակարգից։ Ադրբեջանը փորձեց «Զանգեզուրի միջանցքի» տակ փակել նաև երթուղիների ապաշրջափակման հարցը, որպեսզի վերջիններս չգտնվեն ռուսական հսկողության տակ։ Պուտինի այցը Ադրբեջան հենց դրանով է պայմանավորված»,-«Նյուզ»-ին տված հարցազրույցի ժամանակ ասաց միջազգայնագետ Գրիգոր Բալասանյանը։ «Պուտինի նպատակն է անձամբ Ալիևից հավաստիանալ, որ «Զանգեզուրի միջանցքի» հարցը առհասարակ դուրս է գալու օրակարգից, իսկ ենթակառուցվածքների ապաշրջափակման հարցը մնալու է օրակարգում և հայ-ադրբեջանական հարաբերությունների ապագա խաղաղության պայմանագրի կազմում։ Ռուսաստանը հերթական անգամ ասում է՝ ես գտնվելով մի քիչ խառը վիճակում, չի նշանակում, որ մենք մոռացել ենք, որ նոյեմբերի 9-ին ինչ-որ բան ենք ստորագրել»,- նշեց Բալասանյանը։