«Հայաստան պետությունը մեռած է». Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Հայաստան պետությունը մեռած է
Օգոստոսի 19-ը ՌԴ նախագահ Վլադիմիր Պուտինը պետական ​​այցով Բաքվում է, որտեղ բանակցություններ է վարում Իլհամ Ալիևի հետ։
ՌԴ նախագահի մամուլի ծառայության՝ Պուտինի Ադրբեջան պետական ​​այցի նախօրեին տարածված նյութում ասված է․
«Առանցքային խնդիրները մնում են խաղաղության պայմանագրի ստորագրումը, հայ–ադրբեջանական սահմանի սահմանազատման գործընթացի խթանումը, ենթակառուցվածքների ապաշրջափակումը ամենաբարձր մակարդակով 2020-2022 թթ. ձեռք բերված եռակողմ համաձայնագրերի հիման վրա»։
Նշվում է, որ ՌԴ նախագահի՝ Բաքու պետական այցի շրջանակում Ռուսաստանի և Ադրբեջանի ղեկավար Վլադիմիր Պուտինն ու Իլհամ Ալիևը ի թիվս այլ հարցերի կքննարկեն նաև տարածաշրջանային և միջազգային խնդիրներ, այդ թվում՝ հայ–ադրբեջանական հարաբերությունների կարգավորման թեման։
2024թ․ մարտի 18-ին Ոսկեպար գյուղի մշակույթի տանը, Ոսկեպարի բնակիչների հետ, առանց գյուղացիների կողմից տեսանկարահանման, ձայնագրման հնարավորության կայացած հանդիպման ժամանակ Նիկոլ Փաշինյանը ոսկեպարցիներին ասել է, որ եթե նրանք չհամաձայնվեն Ադրբեջանին տարածքների հանձնմանը, մեկ շաբաթից Ադրբեջանը, Թուրքիան, Ռուսաստանը պատերազմ են սկսելու Հայաստանի դեմ։ Վարչապետ Նիկոլ Փաշինյանը այդ հայտարարությամբ Ռուսաստանը համարել է՝ որպես Հայաստանին թշնամի երկիր։ Ադրբեջանն էլ եղել ու մնում է Հայաստանին թշնամի երկիր։ Հիմա Բաքվում, ըստ Փաշինյանի՝ թշնամի Ռուսաստանի և Ադրբեջանի նախագահները քննարկում են, բախտորոշ որոշումներ կայացնում հայ-ադրբեջանական հարաբերությունների վերաբերյալ, իսկ վարչապետ Նիկոլ Փաշինյանն անդարդի նման հեծանիվ է քշում, իրական Հայաստանի մասին ոտանավոր հորինում ու արտասանում, Հայաստանի ԱԳՆ-ն էլ լուռ է ու լուռ։ Հայաստան պետությունը մեռած է, իսկ բնակչությունն էլ Վարդավառին զոհաբերվող գառան նման հեզորեն սպասում է իր դառը ճակատագրին»։