«Նիկոլը տառապում է Սերժ Սարգսյանի հիվանդությամբ». Նաիրի Հոխիկյան

Լրագրող Նաիրի Հոխիկյանի ֆեյսբուքյան գրառումը․ «Վերջին ամիսներին ինձ մոտ տպավորություն է ստեղծվում, որ Նիկոլը տառապում է Սերժ Սարգսյանի կառավարման վերջին 2-3 տարիների հիվանդությամբ, բայց արագ զարգացող ախտանշաններով։
Սերժ Սարգսյանը 2016-ին կամ 2017-ին երբեմն հանդիպում էր հասարակ մարդկանց հետ և պնդումներին, թե երկիրը գնում է սխալ ճանապարհով, ժողովուրդն էլ դժգոհ է ամեն ինչից, և դա խիստ վտանգավոր երևույթ է, պատասխանում էր, թե ինքը ժողովրդի դժգոհությունների մասին երբեք չի լսում, ոչ ոք իր մոտ չի բողոքում, մարզային այցերի ժամանակ իրեն աղուհացով են դիմավորում, իսկ աշխատավարձը շատ նորմալ է, մոտ 200.000 դրամով մարդիկ կարող են շատ լավ ընտանիք պահել։
Սերժ Սարգսյանն այսպես զբաղվեց ինքնախաբեությամբ ու 2018-ին կանգնեց փաստի առաջ։ Գուցե կանգնեց փաստի առաջ։
Հիմա Նիկոլը նույն բանն է անում։ Շրջում է մարզերում, հանդիպում միայն հատուկ ընտրված մարդկանց հետ, որոնք իրեն քծնում ու շողոքորթում են, իսկ երբ հանկարծ լինում են համարձակ գյուղացիներ ու ասում ճշմարտության թեկուզ մեկ տոկոսը, Նիկոլը հայտնվում է ցայտնոտի մեջ, սկսում գոռգոռալ ու վիրավորել։
Նիկոլը ուզում է իրեն մատուցված իրականությունը, որը հազարավոր կիլոմետրերով հեռու է իրական իրականությունից։
Նիկոլը գիտի իր բերած իրականության ամբողջ ողբերգությունը, բայց ուզում է բոլորին ստիպել, որ մտածեն միայն իր ուզած իրականության մասին, որը չկա։
Հոգեվարքի մեջ գտնվող մարդը մեռնելուց առաջ ժպտում է, թեթև շունչ է քաշում, նույնիսկ հրահանգներ տալիս մահճի կողքին կանգնած մարդկանց, այնինչ այդ մարդիկ հասկանում են, որ վերջը մոտ է, ու մտածում են մեռնողի ունեցվածքը կիսելու մասին»։