«Այսօր ունենք մեկ գերակա խնդիր»․ Սուրեն Պետրոսյան

«Ժողովրդավարական համախմբում» կուսակցության նախագահ Սուրեն Պետրոսյանի գրառումը. «Սիրելի հայրենակիցներ, Անկախությունը բացարձակ արժեք է և բարձրագույն պատասխանատվություն իսկ անկախ պետականությունն ինչպես բոլոր ժամանակներում, այնպես էլ այսօր՝ 21-րդ դարում, երաշխիք ժողովուրդների ազատ, անկախ և անվտանգ կենսագործունեության։
Ցավոք, անցնող տասնամյակների ընթացքում մենք այդպես էլ չկարողացանք լուծել մեզ համար կենսական նշանակություն ունեցող առաջնային խնդիրը, այն է ձևավորել քաղաքական համակարգ, որի հենասյունը կլինի ՀԱՅԿԱԿԱՆ ԷԼԻՏԱՆ։
Դա էր հիմնական պատճառը, որ Հայաստանի Հանրապետությունը չունեցավ տեսլական, անկարող եղավ ըմբռնել ժամանակի ոգին, չընկալեց կերպափոխվող աշխարհի տրամաբանությունը, ձևը գերադասեց բովանդակությանը, որի հետևանքով հայտնվեց պոստմոդեռնի ծանրագույն փլատակների տակ։ Փոխարենը ունեցանք լոկ վերնախավ, որին բնորոշ էր հպատակային քաղաքականությունը, սեփական ճակատագրի պատասխանատուներին այլոց մեջ փնտրելը, իսկ որպես բացարձակ «արժեք» ընկալվում էր անձնական և նեղ խմբային շահը։
Այս ամենի հավաքական հետևանքը դարձավ այն, որ այսօր ունենք տապալված պետություն և այնպիսի քաղաքական վերնախավ, որը նույնիսկ նվազագույն աղերս չունի ոչ հայկականության, և ոչ էլ պետականության հետ։
Այսօր մեր հիմնական և ամենախորքային խնդիրներն ամենևին էլ աշխարհաքաղաքական և տնտեսական չեն՝ ինչպես փորձում են ներկայացնել։ Մենք այսօր ունենք մեկ գերակա խնդիր՝ հավաքագրել և ձևավորել Հայկական էլիտա։
Այսուհետ սեպտեմբերի 21-ն իր մեջ պետք է ներառի նաև Հայկական էլիտայի հավաքագրման հրամայականն ու խորհուրդը։
Միայն Հայակական էլիտայի հավաքագրման և ձևավորման դեպքում մենք կարող ենք դուրս գալ պոստմոդեռնի փլատակների տակից և ձևավորել Հայկական պետություն, որը կլինի իրականում անկախ, իր էությամբ և ոչ թե ձևով:
Շնորհավոր անկախության օրվա առիթով»։