Արցախից բռնի տեղահանված քաղաքացիների տրանսպորտային միջոցների սեփականության իրավունքի գրանցումը կիրականացվի արտոնյալ ընթացակարգով

Կառվարությունն այսօր որոշում ընդունեց, համաձայն որի Արցախից բռնի տեղահանված քաղաքացիներն իրենց տրանսպորտային միջոցների համար սեփականության իրավունքի գրանցումը կարող են իրականացնել անխոչընդոտ՝ պարզեցված և արտոնյալ ընթացակարգով։
Սեփականության իրավունքի պետական գրանցման ժամանակ շահառուներից չի պահանջվի փոխադրամիջոցի գույքահարկի պարտավորությունների ամբողջական կատարման մասին տեղեկանք։

Նախագծում նշվում է, որ տեղահանման արդյունքում ՀՀ-ում են հայտնվել մասնավոր սեփականություն չհանդիսացող թեթև մարդատար ավտոմոբիլներ, որոնք, ունենալով փաստացի օգտագործողներ, դեռևս չեն հանդիսանում սեփականության իրավունքի օրինական օբյեկտ: Հետևաբար, համաձայն որոշման հիմնավորման․ «Անհրաժեշտություն է առաջացել պարզեցված ընթացակարգով լուծել նշված տրանսպորտային միջոցների նկատմամբ սեփականության իրավունքի պետական գրանցման խնդիրը՝ շեշտադրում կատարելով ԼՂ-ից բռնի տեղահանված անձանց իրավունքների պաշտպանության առաջնահերթության վրա»։