«Ինչո՞ւ չի համաձայնեցվել սկզբունք՝ նախ քարտեզի վրա, հետո՝ հողի»․ Լևոն Քոչարյան

Ընթանում է ԱԺ արտաքին հարաբերությունների մշտական հանձնաժողովի նիստը:

Քննարկվում է «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին հարցը:

«Հայաստան» խմբակցության պատգամավոր Լևոն Քոչարյանը հարց ուղղեց հիմնական զեկուցող Մհեր Գրիգորյանին․ «Հանրության մեծ մասը չունի էն վստահությունը Ադրբեջանի նկատմամբ, ոնց ունի էս կառավարությունը։ Ես ու շատերն ունենք մտավախություն, որ Ադրբեջանն իր ուզած հատվածում անելու է սահմանազատում, ստանալու է իր ուզածը, և ընդհանուր գործընթացը հնարավոր է ավարտին չհասնի։ Ինչո՞ւ չի համաձայնեցվել մի սկզբունք, որով ամբողջ երկայնքով քարտեզի վրա կլինեն պայմանավորվածությունները, հետո նոր, ամեն ինչ համաձայնեցնելու դեպքում միայն, հողի վրա կարվեն աշխատանքները»։

Մհեր Գրիգորյանը պատասխանեց․ «Չեմ բացառում, որ կան ռիսկեր, որ գործընթացը կխզվի կամ չի ավարտվի։ Բայց չկա ռիսկ, որ մի հատված կլինի իրավաբանորեն ձևակերպված որպես ենթադրենք սահման, իսկ հետո պայմանագիր չի ստորագրվի ու պայմանագրում դա չի կլանվի։ Վերջնական պայմանագրում լինելու ա դրան կից մեծ արձանագրություն-նկարագրություն՝ բոլոր հատվածների նկարագրումով։ Սա է մեխանիզմը»։