«Նմանվել եք սաղ գիշեր լևի գնացող հարստացած չինովնիկի»․ Պեդրո Զարոկյանը՝ քաղաքային իշխանությանը

Երևանի ավագանու ընդդիմադիր անդամ Պեդրո Զարոկյանը քաղաքային իշխանությանը համեմատեց գյուղից քաղաք եկած, հարստացած կաշառակեր չինովնիկի հետ, ով չգիտի՝ փողը որտեղ ծախսի․ «Առաջինը, մի հատ սև Մերսեդես ա առնում, տան համար ոսկեջրած կահույքներ ա առնում, երեխեքին անտեսում ու սաղ գիշեր լևի ա գնում։ Այս տրամաբանությամբ եք դուք։ Կոռուպցիան զրկում է ղեկավարներին պարզ տրամաբանությունից»,- ասաց Զարոկյանը՝ դեմ արտահայտվելով այն նախագծին, որով առաջարկվում է 100 տարեկանը լրացած քաղաքացիներին 1 մլն դրամ հատկացնել։ Նա, փոխարենը, առաջարկեց այդ գումարը տրամադրել երեխաներին՝ նշելով, որ Երևանի հանրային դպրոցներում երեխաների մի զգալի մասը տառապում է թերսնումից, իսկ դպրոցներում սնունդ չի տրամադրվում։ Զարոկյանը նաև մեղադրեց Երևանի քաղաքապետարանին՝ ֆուտբոլի և բասկետբոլի զարգացման ուղղությամբ ծրագրեր չիրականացնելու մեջ։ Ի պատասխան հնչած կարծիքին՝ Ավինյանն ընթերցեց վարչական շրջաններում կառուցված և կառուցվելիք ֆուտբոլային դաշտերի ցանկը։
Հ․Գ․ Երևանի ավագանին ընդունեց քաղաքի բնակիչներին, 100-ամյակը լրանալու կապակցությամբ, քաղաքային բյուջեից 1,000,000 ՀՀ դրամի չափով դրամական աջակցություն ցուցաբերելու վերաբերյալ նախագիծը։