«Ակնկալում եմ՝ Փաշինյանը չի խուսափի իր խոսքերի համար պատասխան տալու հնարավորությունից»․ Հովհաննես Խուդոյան

«Սրբազան պայքար» շարժման առաջնորդ Բագրատ Սրբազանը դատական հայց էր ներկայացրել ՀՀ վարչապետ Նիկոլ Փաշինյանի դեմ՝ իր հանդեպ զրպարտություն հանդիսացող հայտարարություն անելու համար: Սրբազանը հուլիսի 15-ին Սուրբ Աննա եկեղեցու բակում աջակիցների հետ հանդիպմանը նշել էր Փաշինյանի դեմ հայց ներկայացնելու հիմքերը․ «Էս չարիքի դեմ դատական գործընթաց եմ սկսելու անձամբ: Պարզվում է՝ խորհրդարանում փողկապով էդ նեռը զրպարտել ու ասել է՝ եպիսկոպոսը մոտեցել է հունիսի 12-ին ոստիկաններին, ասել է՝ տղաներ, սաղավարտները իզուր էլ դրել եք, մի դրեք սաղավարտները, հետո գնացել է և քարերով հարվածելու գործընթաց է կազմակերպել նույն մարդը՝ այսինքն, ես: Սկզբում գնացել եմ ասել եմ՝ սաղավարտները հանեք, հետո գնացել եմ, ասել եմ՝ հիմա ջարդեք: Այս հայտարարությունն է արել խորհրդարանի ամբիոնից, նոր եմ իմացել՝ այսօր առավոտյան: Այդ ստախոս վախկոտ նեռը, որը Բեռլինից չգիտեմ մինչև ուր է ուզում հեծանիվ քշել, այդպիսի հայտարարություն է արել ու մենք հիմա կստուգենք՝ Հայաստանում դատական համակարգը գործո՞ւմ է, թե՞ չէ, էդ ո՞ր դատավորն է, որ հանձն առնելու տանել այս գործը մինչև վերջ»:

Սրբազանը պահանջում է զրպարտություն հանդիսացող փաստացի տվյալները հրապարակայնորեն հերքել։

Դատարանը վարույթ էր ընդունել հայցը: Այսօր կայացել է տվյալ գործով դատական նիստը:

Փաստաբան Հովհաննես Խուդոյանը լրագրողների հետ զրույցում նշեց. «Ակնկալիք ունենք, որ Նիկոլ Փաշինյանը չի խուսափելու իր խոսքերի համար պատասխան տալու հնարավորությունից: Թեև այդ անձին բնորոշ է խոսքերը խեղաթյուրելու, փոխելու, ակնհայտ սուտ խոսելու դիրքորոշումներ»: Խուդոյանը ընդգծեց, որ Փաշինյանի ամբողջ ելույթից տեքստից էլ ակնհայտ է, թե ում մասին է խոսում. «հղում է կատարում կոնկրետ ելույթի կոնկրետ հատվածին, ինչպիսի ելույթ այդ օրը ունեցել է կոնկրետ Բագրատ Սրբազանը»: «Նիկոլ Փաշինյանը, որպես հենց իր պաշտոնը զբաղեցնող անձ, ավելի պատասխանատու պետք է լինի, ավելի հանդուրժող պետք է լինի: Եվ նույնիսկ իր քաղաքական օպոնենտների հանդեպ իր խոսքը պետք է կառուցի՝ խստագույնս պահպանելով օրենքի և բարոյականության սահմանները: Բայց իր պարագայում և՛ օրենքի, և՛ բարոյականության առումով շատ հարցեր կան»,-ասաց փաստաբանը։: