«Իշխանությունն ատամներով պաշտպանում է իրավապահ համակարգին, որպեսզի նրանք էլ պաշտպանեն իշխանական աթոռը». Գեղամ Մանուկյան

Հինգ իրավապաշտպանների նախաձեռնությունն այսօր՝ մարդու իրավունքների միջազգային օրը, բողոքի ակցիա է իրականացրել Բռնադատվածներին նվիրված հուշահամալիրի մոտ։

Ակցիային մասնակցում էր ԱԺ «Հայաստան» խմբակցության պատգամավոր Գեղամ Մանուկյանը, ով լրագրողների հետ զրույցում նշեց. «Այսօր քաղհասարակության ներկայացուցիչներն ամբողջական զեկույց էին հրապարակել, որտեղ ներկայացված էին վերջին տարիների քաղաքական բռնաճնշումները, ոստիկանական անօրինականությունները, դատաիրավական այն խայտառակ իրավիճակը, որը կա այս իշխանությունների պարագայում և, որը ուղղակի տոտալ բռնությունների շարք է, որն էլ ապահովում է այս իշխանության դեռ գոյությունը»: Մանուկյանի համոզմամբ՝ այսօր իշխանությունն ու իրավական համակարգը փոխլրացնում են միմյանց. «Իշխանությունը ատամներով պաշտպանում է իրավապահ համակարգին, որպեսզի նրանք էլ ատամներով՝ ինչպես հիմա, պաշտպանեն իշխանության՝ հանրային առումով շատ երերուն, բայց իրավապահ համակարգի պաշտպանությամբ դեռ ամուր մնացող իշխանկան աթոռը»: