Wildberries-ը գործարկել է նոր գործիք․ գնորդները կկարողանան մինչև 35% զեղչ խնդրել

Wildberries-ի օգտատերերը կկարողանան վաճառողից զեղչ խնդրել իրենց հավանած ապրանքի համար, հայտնել է ընկերության մամուլի ծառայությունը։

«Wildberries-ը գործարկում է նոր գործիք՝ «Զեղչ եմ ուզում», որի միջոցով գնորդները կկարողանան անմիջապես մարքեթփլեյսում վաճառողներից իրենց հավանած ապրանքի համար անհատական զեղչ խնդրել»,- ասվում է հաղորդագրության մեջ։

Նշվում է, որ նոր հնարավորությունը հասանելի կլինի այն վաճառողների ապրանքների էջերում, որոնք կմիացնեն այդ գործիքը։ Գնորդը կկարողանա նշել, թե ինչ չափի զեղչ է ցանկանում ստանալ՝ 1%-ից մինչև 35%։ Զեղչ տրամադրելու, ինչպես նաև այն ապրանքների ընտրության որոշումը, որոնց համար հասանելի կլինի այդ հնարավորությունը, կմնա վաճառողի հայեցողությանը։

«Հայցերը կարող են մշակվել ինչպես ձեռքով, այնպես էլ ավտոմատ կերպով։ Առաջին դեպքում վաճառողն է որոշում՝ ընդունել, թե մերժել գնորդի առաջարկը։ Երկրորդ դեպքում վաճառողը նախապես սահմանում է առավելագույն զեղչի չափ կոնկրետ ապրանքի համար»,- պարզաբանել են Wildberries-ից։

Հայցը հաստատվելուց հետո գնորդը ստանում է անհատականացված պրոմոկոդ, որը գործում է 24 ժամ։ Այն հնարավոր կլինի օգտագործել ընտրված ապրանքի մեկ կամ մի քանի միավոր գնելիս։ Ընկերությունից հայտնել են, որ առաջին փուլում գործիքը հասանելի կլինի Ռուսաստանում գործող վաճառողներին։