««Խաղաղության խաչմերուկ» նախագծի իրականցումը կարևոր գործոն է»․ Նիկոլ Փաշինյանը` ԵԱՏՄ նիստում

Ժամանակակից իրողությունների պայմաններում ԵԱՏՄ գործունեությունn անդամ-երկրների միջև տնտեսական համագործակցության զարգացմանը լրացուցիչ ազդակ հաղորդեց։ Այս մասին հայտարարեց ՀՀ վարչապետ Նիկոլ Փաշինյանը ԵԱՏՄ միջկառավարական խորհրդի դեկտեմբերի 13-ի նիստում։
Նա իր խոսքում նշեց, որ ԵԱՏՄ անդամ-պետությունների տարածքում ապրանքների, ծառայությունների, կապիտալի և աշխատուժի ազատ տեղաշարժը բազային սկզբունք է։ Համագործակցության արդյունավետության չափանիշներից մեկը շարունակում է մնալ փոխադարձ առևտրի արգելքների ի հայտ բերումն ու վերացումը։ «Այդ անդադար աշխատանքը մնում է մեր ուշադրության կենտրոնում, և դրա նպատակը շարունակում է մնալ մեր երկրների բիզնեսի զարգացման համար նոր հնարավորությունների ստեղծումը»,- նշեց վարչապետը։
Փաշինյանը նշեց, որ կարևոր է համարում նաև ճանապարհային քարտեզի հաջող գործարկումը էլեկտրոնային առևտրի նպաստավոր պայմանների ստեղծման համար։ Բացի այդ, նա տրանսպորտային-լոգիստիկ ուղիների զարգացմանն ուղղված քայլերի շրջանակում որպես մեկ այլ կարևոր գործոն նշեց «Խաղաղության խաչմերուկ» նախագծի իրականցումը:

Ըստ նրա՝ «Խաղաղության խաչմերուկը» բարենպաստ պայմաններ կստեղծի բոլոր շահագրգիռ պետությունների համար՝ ամբողջովին հարգելով երկրների ինքնիշխանությունը և իրավասությունը: