«Ադրբեջանը վայելում է անպատժելիության պտուղները»․ Սիրանուշ Սահակյան

«Ի սկզբանե մեղադրանքները շինծու են եղել, և լրացվող նոր մեղադրանքներն էլ զուրկ են փաստերից կամ իրավական հիմնավորումներից։ Այո՛, այս մեղադրանքները վրեժխնդրության և ահաբեկման ուղղված միջոցառումներ են»։ Այս մասին հայտնեց իրավապաշտպան, ՄԻԵԴ-ում հայ գերիների ներկայացուցիչ Սիրանուշ Սահակյանը՝ 168-ի եթերում մեկնաբանելով փաստը, որ Ադրբեջանում դատախազներն Արցախի պետնախարար Ռուբեն Վարդանյանի դեմ առաջադրել են 45 նոր մեղադրանք։
Սահակյանի խոսքերով, բոլոր հանցագործությունները հայելային կերպով վերագրվում են Ռուբեն Վարդանյանին։ Նոր առաջադրված հոդվածներից քսանի մեջ, ըստ իրավապաշտպանի, կան արարքներ, որոնք կապված են, օրինակ, բռնի անհետացումների, բնակչության բռնի տեղահանումների, խոշտանգումների, միջազգային մարդասիրական նորմերը խախտելու, ահաբեկչության հետ, և նշված արարքները ծրագրվել են Ադրբեջանի կառավարության կողմից՝ միջազգային հանրության թողտվության, լռության պայմաններում։ «Այս պահին էլ Ադրբեջանը վայելում է անպատժելիության պտուղները», - նշեց Սահակյանը։