«Հայաստան-Ադրբեջան խաղաղության պայմանագիրը դատարկ փաստաթուղթ է»․ Հայկ Մամիջանյան

«Բազմիցս եմ ասել, որ դա դատարկ փաստաթուղթ է, որովհետև դեմարկացիա-դելիմիտացիան այդ փաստաթղթի մեջ չի, գերիների մասին չկա, ապաշրջափակումը տրանսպորտային՝ չկա, Արցախ վերադարձի կամ արցախահայերի ինքնորոշման մասին որևէ կետ չկա»։ Մեկնաբանելով Հայաստանի և Ադրբեջանի միջև խաղաղության պայմանագրի բովանդակությունը՝ «24 նյուզ»-ի եթերում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը։
Նա նշեց, որ պայմանագրում կան կետեր, ըստ որոնց՝ երկու պետությունները պետք է հրաժարվեն միմյանց դեմ հայցերից միջազգային ատյաններում։ «Բայց էդ դեպքում ես չեմ հասկանում՝ ինչո՞ւ էր Փաշինյանը հող նախապատրաստում դրա համար»,- նշեց Մամիջանյանը։ Նա հավելեց, որ կա նաև կետ, ըստ որի՝ հայ-ադրբեջանական սահմանին կամ շփման գծում պետք է լինի երրորդ երկրների ներկայություն՝ ենթադրաբար խաղաղապահներ։ «Հարց համար մեկ․ ի՞նչ կա, պարոն Փաշինյան, բա դուք ասում էիք առանց միջնորդների և առանց երաշխավորների ենք բանակցում», - ասաց պատգամավորը։
Նրա բնորոշմամբ, երկրորդը՝ և ամենաահավորն այն է, Փաշինյանը պատրաստ էր և առաջարկել էր Ադրբեջանին՝ հանել չհամաձայնեցված կետերը և առանց դրանց ստորագրել։ «Էդքան պետք է էդ թուղթը ներքաղաքական դաշտում օգտագործելու համար և ընտրություններում մեր քաղաքացիներին հերթական անգամ խաբելու համար, որ առանց էդ կետերի պատրաստ էիր ստորագրե՞լ»,- հարցրեց Մամիջանյանը։