«Աղբանոցը ոչ թե լրատվական դաշտն է, այլ քաղաքական միջավայրը»․ Բորիս Նավասարդյան

Երևանի մամուլի ակումբի նախագահ Բորիս Նավասարդյանի ֆեյսբուքյան գրառումը․ «Աղբանոցը ոչ թե լրատվական դաշտն է, այլ քաղաքական միջավայրն է՝ մեզանում իր բոլոր դրսևորումներով և մակարդակներում։ Երբ քամին ուժեղանում է, ինչպես հաճախակիորեն է լինում մեր հանրային կլիմայում, աղբը տարածվում է նաև լրատվամիջոցների ուղղությամբ՝ որքան մոտ են գտնվում քաղաքական աղբանոցին, այդքան մեծ ինտենսիվությամբ։ Արտացոլվելով լրատվամիջոցների հայելիում՝ քաղաքական միջավայրը չի ցանկանում ճանաչել, կամ ավելի շուտ ձև է անում, որ չի ճանաչում ինքն իրեն, և բողոքում է հայելու մեջ տեսած աղբանոցի դեմ։ Իրականում, բազմաթիվ թերություններով հանդերձ, Հայաստանի մեդիաոլորտը առավել կայացած հանրային ինստիտուտն է, և, ինչպես համոզվեցինք վերջին օրերին, շատ ավելի ադեկվատ է, քան ոչ միայն քաղաքական, այլ նաև քաղաքացիական հասարակության, այդ թվում՝ իրավապաշտպան սեկտորը»։