«Արդյո՞ք Տերտերյանի պաշտոնանկության «նախաձեռնությունը» գալիս է նոր նախարարից». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Հաղորդվում է, որ Նիկոլ Փաշինյանի որոշումով պաշտոնանկ է արվել տարածքային կառավարման ու ենթակառուցվածքների փոխնախարար Վաչե Տերտերյանը:

Սա ուշադրության արժանի որոշում է, քանի որ Վաչե Տերտերյանին, ըստ էության, հնարավոր է գնահատել՝ որպես «Կամո Արեյան-2»: Այսինքն, Տերտերյանը տարածքային կառավարման նախարարության փոխնախարարի պաշտոնին է արդեն ավելի քան երկու տասնամյակ: Այդ ընթացքում նախարարությունը ենթարկվել է կառուցվածքային ու անվանական փոփոխությունների, փոխվել են շատ նախարարներ, այդ թվում քաղաքական շարժառիթներով, բայց Վաչե Տերտերյանն իր պաշտոնում եղել է «անձեռնմխելի»:

Իհարկե, այս պարագայում նրա «անձեռնմխելիության» հիմքը թերևս եղել է ոչ թե ինչ-որ ազդեցիկ հովանի, այլ նրա մասնագիտական, պաշտոնեական պիտանելիության բարձր աստիճանը, տարածքային կառավարման ոլորտում նրա կոմպետենտությունը և իրերի դրությանն ու խնդիրներին տիրապետելու կարողությունը:

Ահա այս առումով էլ հատկանշական է, որ պաշտոնանկ է լինում այդ հետագծով փոխնախարարը: Նա ի՞նքն է կամեցել թողնել պաշտոնը, թե՞ դա Նիկոլ Փաշինյանի նախաձեռնությունն է:

Ընդ որում, ուշադրության է արժանի, որ Տերտերյանը պաշտոնանկ է լինում փաստորեն այն բանից հետո, երբ Նիկոլ Փաշինյանը Գնել Սանոսյանի փոխարեն նշանակեց ՏԿԵՆ նոր նախարար՝ Դավիթ Խուդաթյան: Արդյո՞ք Տերտերյանի պաշտոնանկության «նախաձեռնությունը» գալիս է նոր նախարարից, կամ Փաշինյանը փորձում է նախարարությունից հեռացնելով իրապես իր հետագծով կշիռ ունեցող Տերտերյանին, այսպես ասած, ավելի անկաշկանդ միջավայր է ապահովում նորանշանակ նախարարի համար»: