«Տրանսպորտի տոմսային փաթեթներին հնարավոր է ծանոթանալ նոր բացված կայքում»․ Տիգրան Ավինյան

«Միասնական տոմսային համակարգից խոսելիս ավելի հաճախ խոսում ենք սակագներից, բայց այսօր ուզում եմ ևս մեկ անգամ հիշեցնել, որ միասնական տոմսային համակարգի ներդրումը Երևանի քաղաքապետարանի թվային փոխակերպման շատ կարևոր մի մասն է»։ Այս մասին հայտարարեց Երևանի քաղաքապետ Տիգրան Ավինյանը դեկտեմբերի 23-ի գործակարգավարական խորհրդակցությանը։
Նա նշեց, որ ինքն ու իր թիմը հավատացած են՝ այսօր հնարավոր չէ առանց թվայնացման քաղաքացիներին որակյալ ծառայություններ մատուցել։ «Այսօր կներկայացնեմ transport.yerevan.am կայքը, որի գործիքակազմը շարունակաբար ավելանալու է, սակայն այսօր արդեն կարող եք մտնել կայք, ծանոթանալ նոր տոմսային փաթեթներին, հաշվիչի միջոցով հաշվարկել, թե որն է լինելու ամենամատչելի տոմսը հատկապես ձեզ համար»,- ասաց Ավինյանը։ Նա հավելեց, որ գործելու է նաև Երևանի թվային ծառայությունների միասնական հարթակ։