«Կգործի քաղաքաշինության օնլայն թափանցիկ հարթակ»․ Տիգրան Ավինյան

«Սիրելի երևանցինե՛ր, մենք հանձն ենք առել, որ Երևան քաղաքում քաղաքաշինության ոլորտում պետք է ունենանք օնլայն թափանցիկ հարթակ, որտեղ պարզ տրամաբանությամբ յուրաքանչյուր քաղաքացի տեսնելու է առաջին հերթին, թե գլխավոր հատակագծով տվյալ հողատարածքի վրա ինչ տեսակի շարունակություն է նախատեսված»,- դեկտեմբերի 23-ի գործակարգավարական խորհրդակցության ժամանակ դիմելով Երևանի բնակիչներին՝ ասաց քաղաքապետ Տիգրան Ավինյանը։ Բացի այդ, ինչպես նա նշեց, գոտեվորման նախագծերով յուրաքանչյուր քաղաքացի տեսնելու է, թե կառուցապատման ինչ սխեմա է նախատեսված։
«Եվ երրորդը, արդեն իսկ ենթադրում եմ՝ վերջին փուլում, մենք տեսնելու ենք, թե կադաստրային տվյալ հողատարածքում ինչ հնարավորություն է ունենալու յուրաքանչյուր քաղաքացի, այսինքն ինչ ճարտարապետահատակագծային առաջադրանքի հնարավորություն է ունենալու»,- ասաց քաղաքապետը։ Նա հավելեց, որ այս պարզ, թափանցիկ ինֆորմացիայի հիման վրա կստացվի հողամասերի արդար գնահատական։