«Հրավիրողը «Իմ քայլը» հիմնադրամն է, բայց հանդիպման վայրը կառավարական ամառանոցն է»․ Էդգար Ղազարյան

«Հանդիպման թեման վերաբերվում է մեդիա գրագիտությանը, և հրավերն ուղարկվել է մեդիա անգրագիտության դրսևորումներով, որովհետև հրավերն ուղարկվել է մեսենջերով»,- այսպիսի գնահատական հնչեցրեց հասարակական-քաղաքական գործիչ Էդգար Ղազարյանը դեկտեմբերի 23-ի ասուլիսում՝ մեկնաբանելով Աննա Հակոբյանի անունից լրատվամիջոցներին ուղարկված հրավերը՝ «Կրթվելը նորաձև է» արշավի հանդիպում-քննարկմանը։
Նրա խոսքով, լրատվամիջոցները պաշտոնապես գրանցված են, դրանց մեծամասնությունը հավատարմագրված է Կառավարությունում, Ազգային ժողովում, այսինքն՝ նրանք ունեն հասցեներ, էլեկտրոնային փոստի հասցեներ։ «Եվ մեկ էլ պարզվում ա, որ «Իմ քայլը» հիմնադրամում տնօրենի օգնական աղջիկը գյուղական զբոսաշրջությունով ա զբաղվում, մեսենջերով հրավեր ա ուղարկում Աննա Հակոբյանի անունից»,- նշեց Ղազարյանը։
Նրա բնորոշմամբ, հետաքրքիրն այն է, որ հրավիրողը «Իմ քայլը» հիմնադրամն է, բայց հանդիպման վայրը կառավարական ամառանոցն է։ «Հայաստանում քանի՞ հատ հիմնադրամ կա․ մի ժամանակ ինքը (Աննա Հակոբյանը-խմբ․) նախագահն էր «Ժպիտների քաղաք» հիմնադրամի, որի տնօրենը հիմա այլ մարդ ա, ինքը կարա՞ լրատվամիջոցներին հրավիրի կառավարական ամառանոցում հանդիպման»,- ասաց Ղազարյանը։