«Մրմռացող իրականությունը չես քողարկի ո՛չ խոզի բդի հաստությամբ, ո՛չ բլինչիկի բարակությամբ». Արմեն Աշոտյան

«5 հարց՝ Արմեն Աշոտյանին» հեռակա զրույցի շրջանակներում ՀՀԿ փոխնախագահ, քաղբանտարկյալ Արմեն Աշոտյանը դարձյալ պատասխանել է քաղաքացիների հարցերին:

Հարցին՝ ի՞նչ կասեք 2025թ-ի նախաշեմին,

Արմեն Աշոտյանը տնային կալանքի կրման վայրից պատասխանել է. «Կասեմ նույնը, ինչ ասել եմ 2024-ի, 2023-ի, 2022-ի, 2021-ի նախաշեմերին, նույնը, ինչի մասին ընկերներիս հետ զգուշացնում էինք 2018-ից մինչև 2020-ը։

Ցավով նշեմ, որ հերթական անգամ մենք նոր տարի ենք մտնում՝ որպես աշխարհի ամենաանթասիբ և անպատիվ հասարակություն։ Սա շատ դառը, շատ տհաճ, շատ մրմռացնող իրականություն է, որը չես քողարկի ո՛չ խոզի բդի հաստությամբ, ո՛չ բլինչիկի բարակությամբ, ո՛չ էլ սալաթների թարմությամբ։

Մնում է, որ 2025-ին իրական ջանքեր գործադրենք և ազատվենք այդ անպատվաբեր ու խայտառակ տիտղոսից։

Հայ ժողովրդի այս պահի միակ հավաքական մեղքը մեկն է՝ Նիկոլը դեռ վարչապետ է, և գոնե գալիք տարի այդ մեղքը պիտի ընդունել և քավել։ Ու այս ամենը պետք չէ անել ատելությունից դրդված։

Էլի խոստովանեմ, որ ես էլ երկար ժամանակ ատելություն ունեի նրա նկատմամբ, մինչև հասկացա, որ մեր ատելությունը նրան ուժեղացնում է, որ նա սնվում է մեր ատելությամբ։ Ուստի պետք է պայքարել՝ սիրելով Հայրենիքը և մարդկանց, այլ ոչ թե՝ ատելով Փաշինյանին»։