«Քաշքշուկ, բռունցքներ, նման բաներ իրապես չեն եղել»․ Ալխաս Ղազարյան

Երեկ լուրեր տարածվեցին, որ ՔՊ նախաձեռնող խմբի նիստն ավարտվել է քաշքշուկով։ Կռվի գլխավոր դերերում ՔՊ խմբակցության պատգամավոր Հայկ Սարգսյանն ու Տավուշի մարզպետ Հայկ Ղալումյանն են եղել:
Պատճառը՝ Տավուշում տիրող բնապահպանական խայտառակ վիճակն է եղել, ապօրինի ծառահատումները:
ՔՊ-ական պատգամավորը ծառահատումների վերաբերյալ սուր ելույթ է ունեցել ու մեղադրել մարզպետին, ինչն էլ ավարտվել է փոխադարձ վիրավորանքներով ու քաշքշուկով:

Լրատվամիջոցի տեղեկություններով՝ ՔՊ-ականներն իրար հարվածել են Նիկոլ Փաշինյանի ներկայությամբ, վերջինս թողել-հեռացել է:

«Լուրը չափազանցված է։ Տարբեր հարցերի շուրջ քննարկումներ լինում են, և, բնականաբար, կարող են լինել գործընկերներ, որոնց կարծիքները չհամընկնեն, բայց քաշքշուկ, բռունցքներ, նման բաներ իրապես չեն եղել»,- այսօր ԱԺ-ում լրագրողների հետ զրույցում ասաց ՔՊ—ական պատգամավոր Ալխաս Ղազարյանը՝ նշելով, որ ո՛չ նիստի ժամանակ, ո՛չ էլ դրսում նման դեպք չի եղել․ «Դրսում, նիստից հետո գուցե թվացել է, որ կռիվ է եղել, բայց անկեղծ եմ ասում ոչ մի նման դեպք չի եղել»,- ասաց պատգամավորը՝ զարմանք հայտնելով, թե ինչու է շրջանառվում հատկապես ՔՊ-ական պատգամավոր Հայկ Սարգսյանի և Տավուշի մարզպեի անունները։