«Ծեծկռտուք չի եղել, հատկապես՝ վարչապետի ներկայությամբ»․ Հայկ Սարգսյան

«Կուսակցությունում որևէ վերճ, ծեծկռտուք չի եղել և չի կարող լինել, հատկապես՝ վարչապետի ներկայությամբ»,- լրագրողների հետ զրույցում ասաց ՔՊ-ական պատգամավոր Հայկ Սարգսյանը՝ հերքելով այն լուրերը, թե «Քաղաքացիական պայմանագիր» կուսակցության նիստի ժամանակ նրա և Տավուշի մարզպետ Հակ Ղալումյանի միջև ծեծկռտուք է եղել։
Հիշեցնենք, որ ըստ մամուլի հրապարակումների, ծեծկռտուքը տեղի է ունեցել Հայկ Սարգսյանի ելույթից հետո՝ վերաբերող Տավուշի մարզում ընթացող լայնածավալ ծառահատումներին:
Պատգամավորը հաստատեց, որ նման մտահոգություններ հայտնել է նիստի ժամանակ, սակայն այն վեճի առիթ չի դարձել, հատկապես, որ իր քննադատությունն ավելի շատ ուղղված է եղել Շրջակա միջավայրի նախարարությանը։
Հարցին՝ ճի՞շտ են լուրերը, թե նա վարչապետի «սև ցուցակում» է հայտնվել, պատգամավորը պատասխանեց, որ իրենց հարաբերությունները երբեք այսքան լավ չեն եղել։