«Հույս ունեմ՝ Եղիշե Հակոբյանի տեղեկությունները լույս կսփռեն այս ոճրագործության վրա»․ Նորիկ Նորիկյան

«Մեղադրյալ Եղիշե Հակոբյանը ցանկություն հայտնեց կոնֆիդենցիալ հանդիպում ունենալ ինձ հետ, դատարանը բավարարեց այդ միջնորդությունը»,- այս մասին լրագրողների հետ զրույցում հայտարարեց հրդեհից մահացած զինծառայողների շահերի ներկայացուցիչ Նորիկ Նորիկյանը։
«Առաջիկա օրերին պատրաստվում եմ հանդիպել նրան, հույս ունեմ, որ Եղիշե Հակոբյանը գործի իրական հանգամանքների վերաբերյալ կտա հանգամանալից տեղեկություններ, մենք հույս ունենք, որ ի վերջո լույս կսփռվի այս ոճրագործության վրա, և կիմանանանք՝ ինչ է եղել իրականում»,- նշեց փաստաբանը։

Նա նաև հայտնեց, որ այսօր ՀՀ Գեղարքունիքի մարզի առաջին ատյանի ընդհանուր իրավասության դատարանի Սևան քաղաքի նստավայրում տեղի ունեցող Ազատ գյուղի զինվորական կացարանում զոհված 15 զինծառայողների գործով դատական նիստի ժամանակ ՀՀ ԶՈՒ թիկունքի վարչության հրդեհային անվտանգության ծառայության նախկին պետ Սարգիս Մազմանյանը հարցաքննության ընթացքում տեղեկացրել է, որ նույն զորամասում տեղի ունեցած ողբերգությունից 2 ամիս առաջ մարտական դիրքում կրկին բենզինի միջոցով վառարանը վառելու հետևանքով հրդեհվել է մարտական դիրքը, մի քանի զինծառայող այրվածքներ են ստացել։

«Ես համոզված եմ, որ եթե այդ դեպքից հետո ձեռնարկված լինեին լրջագույն կանխարգելիչ միջոցներ, և պատասխանատուներին պատասխանատվության ենթարկած լինեին, հետագայում հնարավոր է այդ ողբերգությունը տեղի չէր ունենա»,- ընդգծեց Նորիկյանը։