Իրանը պատրաստ է բացել Հորմուզի նեղուցը որոշակի պայմաններով

Իրանը պատրաստ է բացել Հորմուզի նեղուցը նավագնացության համար որոշակի պայմաններով, այդ թվում՝ պատժամիջոցների երաշխավորված վերացման դեպքում, հաղորդում է Tasnim-ը։

«Հորմուզի նեղուցի հնարավոր վերաբացումը կախված է այնպիսի նախապայմաններից, ինչպիսիք են պատժամիջոցների երաշխավորված վերացումը, ամերիկյան [ռազմական] բազաների փակումը, [իրանական] սառեցված ակտիվների ապաշրջափակումը և դոլարից բացի այլ արժույթներով առևտրի զարգացումը», - ասվում է հայտարարության մեջ։

Թեհրանը նախկինում հայտարարել էր, որ թույլատրել է Իրանի դեմ ԱՄՆ-ի և Իսրայելի գործողությանը չմասնակցող որոշ երկրների նավերի անցնել Հորմուզի նեղուցով։ Իրանի արտաքին գործերի նախարարության խոսնակ Էսմայիլ Բաղային ընդգծել է, որ նեղուցը փակ չէ, բայց դրանով նավարկությունը թույլատրվում է միայն որոշակի պայմաններով։ Նա մանրամասներ չի հայտնել։

Ավելի վաղ Իրանի բարձրաստիճան պաշտոնյան CNN-ին ասել էր, որ Թեհրանը քննարկում է նավթատար նավերի սահմանափակ անցման հնարավորությունը Հորմուզի նեղուցով, եթե դրանց բեռնափոխադրումները կատարվեն չինական յուանով: Իրանի Իսլամական հեղափոխության պահապանների կորպուսը (ԻՀՊԿ) նախկինում որպես կամեցող երկրներից նավերի անցման պայման նշել էր ԱՄՆ-ի և Իսրայելի դեսպանների վտարումը։

Հորմուզի նեղուցով է անցնում աշխարհի նավթի մոտ 20%-ը և հեղուկ բնական գազի համաշխարհային մատակարարումների մինչև 30%-ը, այն համարվում է մոլորակի ամենակարևոր էներգետիկ զարկերակը։