«ՀՀ-ում Բելառուսի դեսպանը պետք է հայտարարվի persona non grata». Արման Բաբաջանյան

ՀՀ ԱԺ նախկին պատգամավոր Արման Բաբաջանյանի ֆեյսբուքյան գրառումը. «Հայաստանը ոչ միայն չպետք է շնորհավորի Բելառուսում տեղի ունեցած ընտրությունների արդյունքները, այլև պետք է պաշտոնապես հայտարարի, որ չի ճանաչում այդ ընտրությունների լեգիտիմությունը՝ հաշվի առնելով Բելառուսի իշխանությունների բռնապետական բնույթը և միջազգային նորմերի կոպիտ խախտումը։ Հայաստանում Բելառուսի դեսպանը պետք է հայտարարվի persona non grata և տրվի 24 ժամ՝ Հայաստանի տարածքը լքելու համար։
Այսպիսի քայլը կլինի տրամաբանական շարունակությունն այն քաղաքականության, որը Հայաստանը նախապես հայտարարել էր՝ իջեցնելով հարաբերությունների մակարդակը Բելառուսի հետ։ Տե՛ր կանգնել սեփական հայտարարություններին նշանակում է ապահովել Հայաստանի պետական դիրքորոշման կշիռը և պաշտպանել երկրի արժանապատվությունը։
Բելառուսի գործող ղեկավար Ալեքսանդր Լուկաշենկոն հերթական անգամ բացահայտ ցուցադրեց Հայաստանի նկատմամբ անհարգալից վերաբերմունք՝ մանիպուլացնելով իրավիճակը և օգտագործելով անհիմն հայտարարություններ։ Այս պահվածքը ոչ միայն քաղաքական, այլև բարոյական տեսանկյունից անընդունելի է։
Հայաստանը պետք է անհապաղ նախաձեռնի հարաբերությունների նվազագույն մակարդակի սահմանում Բելառուսի հետ, եթե ոչ ամբողջական դիվանագիտական կապերի խզում, քանի դեռ այդ երկրի ղեկավարը Ալեքսանդր Լուկաշենկոն է։ Միևնույն ժամանակ, անհրաժեշտ է Հայաստանի դիրքորոշումը միջազգային հանրությանը, իրական և անիևական դաշնակիցներին, հստակ ներկայացնել՝ ընդգծելով, որ Հայաստանը չի հանդուրժի դաշնակցային պարտավորությունների խախտումը և սադրանքները։
Այս քայլերը, ի լրումն, կհաղորդեն Հայաստանի վճռականությունը պաշտպանելու իր ազգային շահերը, արժանապատվությունը և ինքնիշխանությունը՝ անկախ որևէ արտաքին ճնշումից կամ մանիպուլյացիայից։ Հայաստանը պետք է լինի օրինակ դիվանագիտական ուժեղ և սկզբունքային քաղաքականություն վարելու գործում»: