Երկուշաբթի, 23 փետրվարի, 2026 թ.
|
Ստեփանակերտում`   +4 °C

«Ընդդիմությունը չի ցանկանում տեսնել իշխանության ակնհայտ անպաշտպան դարպասը, որտեղ կարելի է գոլեր խփել»․ Հայկ Դեմոյան

«Ընդդիմությունը չի ցանկանում տեսնել իշխանության ակնհայտ անպաշտպան դարպասը, որտեղ կարելի է գոլեր խփել»․ Հայկ Դեմոյան
277
Հինգշաբթի, 06 փետրվարի, 2025 թ., 00:30

Ցեղասպանության թանգարան-ինստիտուտի նախկին տնօրեն, պատմաբան Հայկ Դեմոյանի ֆեյսբուքյան գրառումը․ «Ընդդիմության դիմադրությունը.

Որևէ այլ երկրում գործող իշխանության ներկայացուցչի կամ ներկայացուցիչների կողմից փողերի լվացում, գողություն, գումարների հափշտակում, կոռուպցիոն գործարքներ կատարելն ու դրանց բացահայտումը կդիտարկվեին որպես մուրազ թեմաներ՝ հանրային աղմկալից հետաքննություն իրականացնելու, գործող իշխանությանը ուզածի պես վարկաբեկելու, անվստահություն հայտնելու և հեռացումը կազմակերպելու հուժկու շարժում սկսելու համար:

Վեց տարի շարունակ խոսում ու բարձրաձայնում եմ աղաղակող հանցագործությունների շղթայի մասին, հրապարակում եմ փաստեր, տալիս եմ անուններ, սակայն մինչ օրս քաղաքական ու խորհրդարանական ընդդիմության ոչ մի ներկայացուցիչ չի հետաքրքրվել, առավել ևս չի ցանկացել անգամ Ազգային ժողովում գտնվող Վլադիմիր Վարդանյանին ու այնտեղ պարբերաբար հայտնվող Արարատ Միրզոյանին, Ժաննա Անդրեասյանին ու հատկապես Նիկոլ Փաշինյանին ուղղել որևէ հարց այս թեմաների շուրջ: Իսկ թեմաներն այնքան լուրջ են, որ դրանով կարելի էր սկսել ու «փառահեղ» վերջ տալ ցանկացած իշխանության՝ դրա քաղաքական վարկանիշն իջեցնելով բացարձակ զրոյի: Այո, այ այսպիսի զրոյի 0:

Մեր քաղաքական ընդդիմությունը համառորեն չի ցանկանում տեսնել ակնհաjտ անպաշտպան դարպասը, որտեղ ցանկացած քանակի գոլ կարելի է խփել:

Հետևությունը շատ դաժան է. քաղաքական ընդդիմությունն ու գործող իշխանությունները սպասարկում են մեկ գլխավոր օրակարգ՝ տարբեր դերակատարումներով՝ կառավարվելով մեկ կենտրոնից:

Այս հետևությունը կհամարեմ հնացած ու սխալ, եթե խորհրդարանական ընդդիմությունն ու հատկապես ՀՅԴ-ն Ազգային ժողովում կնախաձեռնի հատուկ լսումներ՝ գործող իշխանությունների ներկայացուցիչների և նրանց կողմից հովանավորվող անձանց կողմից բազմաթիվ քրեորեն հետապնդելի հանցագործությունների շուրջ քննարկում անցկացնելու համար՝ հրավիրելով ՔՊ-ական պատգամավորների, նախարարների ու ՀՀ Գլխավոր դատախազին:

Հետգրություն՝ լրացման տեսքով.

Հայոց ցեղասպանության պատմական փաստի ժխտումը Նիկոլի կողմից, ինչպես նաև մյուս հակապետական ու հակաազգային հայտարարություններն ու գործողությունները միմիայն բխում են ընդդիմության անգործությունից ու դրա հետևանքը հանդիսացող անպատիժ մնալու ինքնավստահությունից»:

Աղբյուրը`   Հայկ Դեմոյան