Զախարովան կոչ արեց ադրբեջանական լրատվամիջոցներին` իրենց ավելի պատասխանատու պահել

ՌԴ ԱԳՆ պաշտոնական ներկայացուցիչ Մարիա Զախարովային հայ լրագրողը հարց է տվել ադրբեջանական լրատվամիջոցներում հրապարակումների և Ադրբեջանի նախագահ Իլհամ Ալիևի հայտարարությունների մասին, որոնք պատմական հայկական Սյունիքի մարզի նկատմամբ տարածքային պահանջներ են պարունակում:

«Ադրբեջանական առաջատար, պետության կողմից ֆինանսավորվող հեռուստաալիքում մի ռեպորտաժ հրապարակվեց, որում ասվում էր, թե 20-րդ դարում Ռուսաստանն իբրև թե «ադրբեջանական» Զանգեզուրի շրջանն ու այլ շրջաններ տվել է Հայաստանին, որ Ռուսաստանն է կանգնած եղել Ղարաբաղյան պատերազմի հետևում ու կանգնել է հայերին թիկունքին: Ալիևն էլ վերջերս հայտարարեց, թե իրենք չեն մոռացել ու չեն մոռանալու Զանգեզուրը»,- նկատեց լրագրողը:

«Մեր դիրքորոշումն այն է, որ լրատվամիջոցները, հաշվի առնելով այն ցավն ու վիշտը, որ արդեն զգացել են այս տարածաշրջանի ժողովուրդները, պետք է իրենց պատասխանատու պահեն, այնուամենայնիվ, պետք է աշխատեն խաղաղ կարգավորման օգտին և չփորձեն ապակայունացնել իրավիճակը: Այս իրավիճակում, որը դուք նշեցիք, ես ևս մեկ անգամ հաստատում եմ թե՛ մեր դիրքորոշումը, և թե՛ մեր կոչը»,- նշել է Զախարովան։