«Զելենսկուն զգուշացնում են, որ Թրամփի վարչակազմը չունի «մուկնուկատու» խաղալու տրամադրություն». Հակոբ Բադալյան

Քաղաքական մեկնաբան Հակոբ Բադալյանի գրառումը․ «Ուկրաինայի հարցերով Թրամփի հատուկ ներկայացուցիչ Քելլոգը բավականին կոշտ հայտարարություն է արել Զելենսկու հասցեին:
Զելենսկին ասել էր, թե Ուկրաինան 174 միլիարդ դոլար չի ստացել ԱՄՆ-ից: Քելլոգն այդ մասին լրագրողի հարցին պատասխանում է, որ ամերիկացի ժողովուրդը 174 միլիարդ է տվել Ուկրաինային, նշանակվել են այդ փողի հոսքը վերահսկող տեսուչներ թե ԱՄՆ-ում, թե Ուկրաինայում, և իրենք մանրամասն հաշվետվություն ունեն այդ փողերի առնչությամբ:
Փաստացի Քելլոգը Զելենսկուն զգուշացնում է, որ Թրամփի վարչակազմը չունի «մուկնուկատու» խաղալու տրամադրություն և Զելենսկու խաղը կարող է ավարտվել նրանով, որ նա ի վերջո ամերիկացի ժողովրդի փողերի համար ստիպված լինի պատասխան տալ իրավական կարգով:
Ընդ որում, հատկանշական է, որ ԱՄՆ-ի այս զգուշացումը հնչում է այն բանից հետո, երբ Կիևում ընդունում են Բրիտանիայի ԱԳ նախարարին: Բրիտանիայի դերն ուկրաինական պատմության մեջ նշմարված է վաղուց՝ Լոնդոնը կողմնակից չէ կրակի դադարեցման, ունի իր հարցերն ու շահերը: Երբ Թրամպը նախօրեին հայտարարեց, որ կա առաջընթաց ուկրաինական հարցում բանակցությունում, հաջորդ օրն իսկ Կիև թռավ Բրիտանիայի ԱԳ նախարարը:
Եվ ահա, ԱՄՆ-ից բավականին կոշտ զգուշացում Զելենսկուն: Քելլոգը նաև ասել է, որ ինքն ստիպված կլինի անցկացնել նախագահի ընտրություն: Իհարկե նշել է, որ պատերազմի ժամանակ ընտրություն անելը թույլ չի տալիս Ուկրաինայի Սահմանադրությունը, բայց «կգա պահը, երբ իրենք ստիպված կլինեն ընտրություն անցկացնել», հայտարարել է Քելլոգը:
Ավելին, խոսվում է, որ արդեն իսկ առաջիկա օրերին՝ Մյունխենում մեկնարկելիք ամենամյա անվտանգության համաժողովի ընթացքում կարող է ներկայացվել ուկրաինական կարգավորման Թրամփի պլանը:
Եթե դա տեղի ունենա, եթե այն իսկապես ներկայացվի, ապա, թերևս, կնշանակի, որ Թրամփը թերևս լուծել է այդ պլանն իրագործելու ճանապարհի հարցը: Այլապես, եթե այդ հարցը լուծված չլինի, ապա հազիվ թե Թրամփը պաշտոնապես պլան հանրայնացնի»: