«Վերջին 7 տարիների ընթացքում ՀՀ տնտեսությունն աճել է 43,5%-ով»․ Նիկոլ Փաշինյան

«2024 թվականին ՀՀ-ում արձանագրվել է 5,9% տնտեսական իրական աճ»,- Կառավարության նիստում «ՀՀ կառավարության ծրագրի 2024 թվականի կատարման ընթացքի և արդյունքների զեկույցի մասին» նախագիծը քննարկելիս հայտնեց վարչապետ Նիկոլ Փաշինյանը՝ նշելով, որ 2021 թվականին իրենց սահմանած նպատակադրումը եղել է տարեկան միջինում 7% տնտեսական աճ ապահովելը։ «2021 թվականին ապահովվել է 5,8%․ 2022-ին՝ 12,6%, 2023-ին՝ 8,3% տնտեսական աճ, հետևաբար մեր նպատակային ցուցանիշը ապահովված է»,- ասաց Փաշինյանը։ Նրա խոսքով գնաճը 2018 թվականի նկատմամբ եղել է 25,3%, իսկ աշխատավարձի աճը մոտ 40%-ով ավելի է, քան գնաճը, ինչը, ըստ Փաշինյանի, էական ցուցանիշ է։ «2025 թվականի հունվարին միջին աշխատավարձը, որը կազմել է 296 հազար 651 դրամ, 2018 թվականի հունվարի նպատմամբ ավելի է 74%-ով, իսկ գնաճը 2025-ի հունվարին 2018-ի նկատմամբ կազմել է 27,4%»,- ասաց նա՝ հայտնելով նաև, որ վերջին 7 տարիների ընթացքում ՀՀ տնտեսությունն աճել է 43,5%-ով։ Թվարկելով այս տարիների ընթացքում տեղի ունեցած իրադարձությունները՝ պատերազմ, քովիդ, հայտնեց, որ տարեկան 6․1% տնտեսական աճն էական ցուցանիշ է։ Ըստ ներկայացված տվյալների՝ 2018թ-ից ի վեր Հայաստանում ստեղծվել է ավելի քան 203.000 աշխատատեղ․ «ՀՀ-ն շարունակում է մնալ կայուն զարգացման ուղեծրի վրա»,- ասաց Փաշինյանը:
Նշենք, որ Կառավարության ծրագրի 2024 թվականի կատարման ընթացքն առաջիկայում կքննարկվի ԱԺ-ում։