Լևոն Բարսեղյանն առաջադրվեց որպես Գյումրու քաղաքապետի թեկնածու

«Հանրապետություն», «Հանուն Հանրապետության» և «Հայաստանի Եվրոպական» կուսակցությունները հայտարարեցին, որ միասնական «Եվրադաշինք» անվամբ դաշինքով հանդես կգան Գյումրու ավագանու արտահերթ ընտրություններին և որպես թեկնածու առաջադրեցին Ժուռնալիստների «Ասպարեզ» ակումբի նախագահ Լևոն Բարսեղյանին։
«Մենք ընտրություններին մասնակցում ենք հաղթելու համար, ամբողջ քարոզարշավը տանելու ենք բարեկամական մթնոլորտում։ Լևոն Բարսեղյանը Գյումրիում այլընտրանք չունի, նա ամենաքաղաքական թեկնածուն է, ով արժանի է և իրավունք ունի առաջադրվելու»,- ասաց «Հանրապետություն» կուսակցության նախագահ Արամ Սարգսյանը։ Իսկ «Հանուն Հանրապետության» կուսակցության նախագահ Արման Բաբաջանյանի կարծիքով՝ իրենք անխոցելի ու իրական այլընտրանք են. ճնշել չի ստացվի։ Լևոն Բարսեղյանի խոսքով՝ այլևս Գյումրիում չեն կարող ասել, որ ընտրություն չունեին․ «Մարդիկ կորոշեն՝ մենք արժանի կլինենե՞նք իրենց, և, ներողություն անհամեստության համար, հանրությունը արժանի կլինի՞ մեր գաղափարների իրականացմանը»,- ասաց Լևոն Բարսեղյանը։