«Ակնկալում ենք արդար դատավարություն և ուշադիր հետևում ենք զարգացումներին»․ ԵՄ դեսպանը՝ Ռուբեն Վարդանյանի մասին

Եվրոպական միությունը հետևում է փետրվարի 19-ից Բաքվում հացադուլի մեջ գտնվող Արցախի նախկին պետնախարար Ռուբեն Վարդանյանի հետ կապված զարգացումներին։ Այս մասին փետրվարի 28-ին լրագրողների հետ զրույցում ասել է ՀՀ–ում ԵՄ դեսպան Վասիլիս Մարագոսը:

«Ես տեղյակ եմ, թե ինչպիսի զգայնություն կա մարդու իրավունքներին, օրենքի գերակայությանը առնչվող բոլոր դեպքերով թե΄ Հայաստանում, թե΄ միջազգայնորեն։ Այս կոնկրետ դեպքով, ես վստահեցնում եմ, որ ստացել ենք բոլոր հաղորդագրությունները, որոնք մեզ ուղարկվել են եւ շատ ուշադիր հետևում ենք դրանց։

Երոպական միությունը շատ հստակ է ասել՝ մենք ակնկալում ենք արդար դատավարություն, և որ մենք ուշադիր հետևում ենք բոլոր զարգացումներին, որոնք կապված են այս կոնկրետ դեպքի հետ»,-ասաց նա։

Անդրադառնալով դիտարկմանը, որ ահազանգեր կան Ռուբեն Վարդանյանին խոշտանգումների ենթարկելու մասին, դեսպանը նշեց․ «Իմ մանդատը ենթադրում է աշխատանք ՀՀ-ԵՄ հարաբերությունների ուղղությամբ․․․ Ինչպես նշեցի, մենք ուշադիր հետևում ենք, և ես գիտեմ, որ Կարմիր Խաչի միջազգային կազմակերպությունն այցելում է ազատազրկվածներին, մանրամասների համար կարող եք դիմել Կարմիր խաչին։